Har bir mahallaning energetik pasporti shakllantiriladi – energetika vaziri

Har bir mahalla uchun energetik pasport yaratiladi – Energetika vaziri

Energetika vaziri Sherzod Xo‘jayevning ma’lum qilishicha, har bir mahalla uchun barcha muhim ma’lumotlarni o‘z ichiga olgan energetik pasport ishlab chiqiladi.

Vazirning so‘zlariga ko‘ra, ushbu pasportda quyidagi ma’lumotlar aks etadi: mahalladagi iste’molchilar soni va ularning toifalari, elektr energiyasi va tabiiy gaz infratuzilmasining hozirgi holati, ularni ta’mirlash va modernizatsiya qilish uchun zarur bo‘lgan mablag‘ va vaqt miqdori, shuningdek, yangi iste’molchilarni tarmoqqa ulash imkoniyatlari.

Bundan tashqari, elektr va gaz ta’minoti korxonalari hamda iste’molchilar o‘rtasidagi aloqa yangi bosqichga ko‘tariladi. Buning uchun zamonaviy onlayn platformalar ishga tushiriladi, bu esa aholi va tadbirkorlarga mobil ilovalar orqali kerakli ma’lumotlarni olish imkoniyatini beradi. Elektr va gaz ta’minotidagi uzilishlar haqida ham mobil ilovalar orqali tezkor xabarlar berib boriladi. Shu bilan birga, koll-markazlarning faoliyati yanada takomillashtiriladi.

Sherzod Xo‘jayevning ta’kidlashicha, xodimlarga kunlik vazifalarni belgilash, ularning bajarilishini nazorat qilish, hisobotlarni shakllantirish, mavjud xavflarni tahlil qilish, qaysi hududlarda uzilishlar ko‘p kuzatilayotganini aniqlash va kelgusida uzilish yuzaga kelishi mumkin bo‘lgan holatlarni oldindan prognoz qilish imkonini beruvchi tizimlar joriy etiladi.

Energiya resurslari tannarxini pasaytirishda raqobat muhitini kengaytirish va bozor mexanizmlarini jadal joriy etishga ham alohida e’tibor qaratiladi.

Suyultirilgan gazning erkin bozorini shakllantirish bo‘yicha tegishli choralar ko‘riladi. Bunda tadbirkorlarning import qilib olib kirgan suyultirilgan gazini aholi va tadbirkorlik sub’yektlariga sotish jarayonini soddalashtirish, ular uchun qo‘shimcha qulayliklar yaratish bilan birga, xavfsizlik talablariga qat’iy rioya etish ta’minlanadi.