FIFA prezidenti saylovda yutish uchun JCH-2030 finalini Marokashga topshirmoqchi
FIFA prezidenti Janni Infantino 2027-yilgi prezidentlik saylovida gʻalaba qozonish maqsadida 2030-yilgi Jahon chempionati finalini Marokashga berishni vaʼda qilgan.
The Times nashrining xabar berishicha, Infantino Rabotda shoshilinch uchrashuv oʻtkazib, Marokash qirollik futbol federatsiyasi prezidenti Favzi Lekjaaning qoʻllab-quvvatlashiga erishgan. Maʼlumotlarga koʻra, JCh-2030 finali Madriddagi “Santyago Bernabeu” stadionida emas, balki Kasablankada qurilayotgan va dunyodagi eng katta sigʻimga ega boʻlishi kutilayotgan “Hasan II” stadionida oʻtkazilishi rejalashtirilmoqda.
Qayd etilishicha, Infantino oʻn yil avval FIFA prezidentligiga saylanganidan buyon eng ishonchli ittifoqchilaridan biri boʻlgan Marokashning qoʻllab-quvvatlashini saqlab qolishga intilmoqda. Buning evaziga Marokash nafaqat mundial mezbonlaridan biri sifatidagi maqomini mustahkamlaydi, balki Ispaniya va Portugaliya bilan birgalikda oʻtkaziladigan turnir finalini ham qabul qilish imkoniyatini qoʻlga kiritadi.
Biroq bu reja Saudiya Arabistonining roziligiga ham bogʻliq boʻlishi mumkin. Infantino uchun anʼanaviy tayanch hisoblangan va 2034-yilgi Jahon chempionati mezboni sifatida tasdiqlangan mamlakat hozircha bu masala yuzasidan hech qanday munosabat bildirmagan.
Agar Infantino 2027-yilgi FIFA prezidentligi saylovida magʻlub boʻlsa, uning oʻrniga keladigan yangi rahbar final uchrashuvi oʻtkaziladigan stadion boʻyicha qarorni oʻzgartirishi mumkin.
Infantinoning muxoliflari esa final mezboni boʻyicha berilgan har qanday vaʼda yuridik kuchga ega emasligini va FIFA prezidenti almashgan taqdirda bu qaror bekor qilinishi mumkinligini taʼkidlamoqda. Ayni paytda Ispaniya ham, Rafael Luzan rahbarligida va amaldagi Jahon chempioni sifatida, Marokash bilan siyosiy kurashni yanada keskinlashtirmoqda.
Vaziyatga UEFA maslahatchisi Luis Figu ham aralashib, Janni Infantinoni zudlik bilan isteʼfoga chiqishga chaqirdi. Bundan tashqari, oʻnlab Yevropa klublari FIFA’dan ularga vaʼda qilingan, ammo hanuzgacha taqsimlanmagan 250 million dollarlik birdamlik jamgʻarmasi mablagʻlarini talab qilayotgani ham tashkilot atrofidagi bosimni kuchaytirmoqda.
Avvalroq Ispaniyaning hukmron koalitsiyasi deputatlari mamlakat hukumatini 2030-yilgi futbol boʻyicha Jahon chempionatini Marokash bilan birgalikda oʻtkazish rejasidan voz kechishga chaqirgan edi. Bunga Seuta shahridagi migratsiya inqirozi sabab qilib koʻrsatilmoqda.