Dronlar Rossiyaning bir nechta hududiga hujum qildi
Rossiyaning Kursk va Belgorod viloyatlari navbatdagi dronlar hujumiga uchradi. Kursk viloyatida xususiy uyga dron zarbasi oqibatida bir kishi halok bo‘ldi, olti nafar fuqaro jarohat oldi. Belgorod viloyatida esa yana ikki kishi jabrlangan. Shu bilan birga, Moskva tomon uchgan uchta dron havo hujumidan mudofaa tizimlari tomonidan yo‘q qilingani xabar qilindi.
Rossiyaning bir qancha hududlariga dron hujumlari uyushtirildi.
Kursk viloyatida uchuvchisiz uchar apparatlar (dronlar) ishtirokidagi hujum natijasida bir kishi hayotdan ko‘z yumdi, olti nafar fuqaro esa turli darajadagi jarohatlar oldi. Bu haqda viloyat gubernatori Aleksandr Xinshteyn xabar berdi. Uning so‘zlariga ko‘ra, Bolshesoldatskiy tumanidagi Kozirevka qishlog‘ida joylashgan xususiy uyga dron kelib urilgan.
Belgorod viloyatida ham dron hujumlari oqibatida ikki kishi jabrlandi. Viloyat tezkor shtabining ma’lumotlariga ko‘ra, Shebekino shahrida "Orlan" ko‘ngillilar bo‘linmasi jangchilaridan biri yaralangan. Ikkinchi jabrlanuvchi Maslova Pristan posyolkasida yashovchi erkak bo‘lib, uning avtomobiliga dron hujum qilgan. U mina portlashi natijasida jarohat olgan va mustaqil ravishda shifoxonaga murojaat qilgan.
Rossiya poytaxti Moskvaga ham dron hujumi uyushtirishga urinish bo‘lgani ma’lum qilindi. Moskva meri Sergey Sobyaninning xabar berishicha, 6-avgustga o‘tar kechasi shahar tomon harakatlangan uchta uchuvchisiz apparat havo hujumidan mudofaa kuchlari tomonidan yo‘q qilingan. Dastlabki ma’lumotlarga ko‘ra, hodisa oqibatida jabrlanganlar yoki vayronagarchilik qayd etilmagan.
Shuningdek, Yaroslavl viloyatida ham dron hujumlari xavfi e’lon qilindi. Viloyat rahbari Mixail Yevrayev Yaroslavl shahridan Moskva yo‘nalishiga chiqish qismida transport harakati vaqtincha cheklanganini ma’lum qildi. U aholidan ushbu yo‘nalish bo‘ylab safarlarni kechiktirishni yoki aylanma yo‘llardan foydalanishni so‘radi.