Ukrainaning qator hududlari raketa va dronlar bilan hujumga uchradi
Rossiya Qurolli kuchlari 31 iyul kuni Ukrainaga dronlar va raketa vositalari orqali keng ko‘lamli hujum uyushtirdi. Dnipropetrovsk, Zaporijjya, Donetsk, Odessa, Vinnitsa, Chernixiv, Sumi, Kiyev va Xarkiv viloyatlarida amalga oshirilgan zarbalar oqibatida bir necha kishi halok bo‘ldi, o‘nlab insonlar jarohat oldi. Hujumlar natijasida turar joylar, sanoat korxonalari, ta’lim muassasalari, tibbiyot ob’yektlari va boshqa
Ukrainaning bir qancha hududlari raketa va dron hujumlariga uchradi.
Dnipropetrovsk viloyatining Nikopil tumanida Rossiya hujumlari natijasida ikki kishi halok bo‘ldi, yana uch nafar fuqaro jarohatlandi. Viloyat harbiy ma’muriyati rahbari Aleksandr Ganjaning xabar berishicha, sanoat korxonasi va avtomashinalar shikastlangan. Shuningdek, Dnipro, Pavlograd va Sinelnikov tumanlarida oziq-ovqat sanoati korxonasi, qishloq kengashi binosi, o‘quv muassasasi, xususiy uylar va do‘konlarga zarar yetgan.
Zaporijjya viloyatida Rossiya droni fuqarolik avtomobiliga zarba berishi oqibatida bir kishi halok bo‘ldi. Viloyat rahbari Ivan Fedorovning aytishicha, bir kun avval Rossiya qo‘shinlari viloyatning 45 ta aholi punktiga jami 842 ta zarba bergan bo‘lib, natijada olti kishi jarohatlangan.
Donetsk viloyatidagi Kramatorsk shahri ham ommaviy hujumga uchradi. Rossiya aviatsiyasi shaharga to‘rtta boshqariluvchi aviabomba tashlagan. Hujum oqibatida turar joy binolari, supermarket va ta’lim muassasasiga zarar yetgan. Dastlabki ma’lumotlarga ko‘ra, bir kishi halok bo‘lgan, yana to‘rt nafar inson jarohat olgan. Yong‘inlar umumiy 685 kvadrat metr maydonni qamrab olgan bo‘lib, keyinchalik bartaraf etilgan.
Odessa shahrida Rossiya raketa hujumi natijasida fuqarolik infratuzilmasi, korxona hududi, shifoxona va kollej binolari shikastlangan. Ikki kishi jarohat olgan bo‘lib, ulardan birining ahvoli og‘ir deb baholanmoqda.
Vinnitsa viloyatining Gaysin shahrida Rossiyaning zarbali droni "Novaya pochta" kompaniyasi bo‘limiga urilishi oqibatida to‘qqiz kishi jarohatlangan. Hodisa joyida 750 kvadrat metrdan ortiq maydonda yong‘in kelib chiqqan va qutqaruvchilar tomonidan o‘chirilgan.
Xarkiv viloyatida ham Rossiya dronlari shahar atrofidagi pochta terminaliga hujum qilgan. Natijada yuk avtomashinasi yongan, jabrlanganlar haqida ma’lumot berilmagan.
Chernixiv viloyatining Mashevo qishlog‘iga "Gerbera" turidagi dronlar bilan hujum qilingan. To‘rt kishi jarohat olgan, ikki xususiy uy va xo‘jalik binosiga zarar yetgan.
Kiyev viloyatida dron hujumi oqibatida Brovari tumanida xususiy uy, ikki avtomashina va korxonalardan biri binolari shikastlangan. Kiyev shahrida esa havo hujumidan mudofaa tizimlari ishlagani ma’lum qilingan.
Sumi viloyatida Rossiya aviatsiyasi to‘rtta boshqariluvchi aviabomba bilan sanoat hududiga zarba bergan. Bu yerda katta yong‘inlar va jiddiy vayrongarchiliklar kuzatilgan, ammo dastlabki ma’lumotlarga ko‘ra, halok bo‘lganlar va jabrlanganlar yo‘q.
Ukraina Havo kuchlari ma’lumotiga ko‘ra, Rossiya armiyasi bir kechada mamlakat hududiga 255 ta zarbali dron uchirgan. Ularning 195 tasi havo hujumidan mudofaa vositalari tomonidan urib tushirilgan yoki radioelektron kurash tizimlari orqali zararsizlantirilgan. Shu bilan birga, 22 ta dron 14 ta nuqtaga kelib urilgan, yana to‘rt hududda dron parchalari qulagani qayd etilgan.