Rossiya Ukraina bo‘ylab yopirilma zarba yo‘lladi
Butun mamlakat bo‘ylab kamida sakkiz kishi halok bo‘lgan va o‘nlab kishilar jarohatlangan. O‘z navbatida, ukrain dronlari Wildberries’ning yana uchta regiondagi omborlariga hujum qildi.
Rossiya Ukrainaga keng ko‘lamli hujum uyushtirdi
30-iyulga o‘tar kechasi Rossiya harbiylari Ukraina hududlariga keng ko‘lamli hujum uyushtirdi. Bu hujumda 70 dan ortiq raketa va 280 dan ziyod dron ishlatilgan. Ukraina prezidenti Volodimir Zelenskiyning ma’lum qilishicha, Kiyev shahri va viloyati, shuningdek, Dnipropetrovsk, Lviv, Poltava, Xarkiv, Mikolayiv, Sumi, Vinnitsa, Cherkass va Ivano-Frankovsk viloyatlari nishonga olingan. Hujumlar natijasida mamlakat bo‘ylab sakkiz kishi halok bo‘lgan va o‘nlab kishilar jarohatlangan.
Rossiya Mudofaa vazirligi Kiyev, Lviv, Dnipropetrovsk viloyati va Ukrainaning boshqa hududlaridagi harbiy aerodromlar, harbiy korxonalar va logistika markazlariga zarbalar berilganini tasdiqladi. Vazirlik, shuningdek, Odessada va Janubiy portda "harbiy mol-mulk" yetkazib berayotgan yuk kemalari ham nishonga olinganini ta’kidladi.
Yangi hujumlar fonida Zelenskiy g‘arbiy hamkorlarni Ukrainani himoya qilish uchun zarur bo‘lgan havo mudofaasi tizimlari uchun raketalarni yetkazib berishni kechiktirmaslikka chaqirdi. Uning so‘zlariga ko‘ra, o‘tgan tunda Ukraina aviatsiyasi Rossiya raketalarining katta qismini urib tushirgan va "hatto mobil o‘t ochish guruhlari ham qanotli raketalarga qarshi samarali ishlay olgan".
Zelenskiy shunday dedi: "Hamkorlardan havo mudofaasi tizimlari uchun raketalar tanqis bo‘lgan sharoitda, harbiylarimiz deyarli imkonsiz ishlarni amalga oshirmoqda... Bu havo hujumidan mudofaa tizimlari uchun raketalar yetkazib berilmaganda yoki kechikkanda odamlarning hayotini saqlab qoladigan noyob mahoratdir... Barcha hamkorlar qanday va nima bilan yordam bera olishlarini bilishadi. O‘z vaqtida yordam bermaslik, ballistik raketalarga qarshi raketalarni yetkazib berishni kechiktirish aynan shunday vayronagarchiliklarga, afsuski, bugungi kunda mavjud bo‘lgan qurbonlarga olib keladi."
Ukraina Wildberries omborlariga yangi zarbalar berdi: yana uchta ombor yondi
30-iyul kuni ertalab Ukraina dronlari Wildberries marketpleysining yana uchta logistika markaziga hujum uyushtirdi. Kompaniya Penza yaqinidagi va Udmurtiyaning Sarapul shahridagi omborlar zarba ostida qolganini tasdiqladi. Bu omborlarda yong‘in chiqqan. Penzadagi omborga hujum natijasida bir kishi jarohat olgan.
Bundan tashqari, Ukraina dronlari Perm o‘lkasidagi Wildberries omboriga ham zarba bergan. Bu haqda dastlab Ukrainadagi Telegram-kanallar zarbadan keyin yong‘in boshlanganini aks ettiruvchi foto va videolarga tayanib xabar berdi. Keyinroq Rossiyadagi "Agenstvo" va Astra nashrlari Perm rayonining Zamulyanka qishlog‘ida joylashgan logistika markazi hujumga uchraganini ma’lum qildi. Kompaniya va mahalliy rasmiylar hozircha hujum yuzasidan izoh bermagan.
18-iyuldan buyon Ukraina tomonidan zarba berilgan Wildberries omborlari soni 14 taga yetdi. Kiyev bu hujumlarni ushbu omborlarda dronlar uchun ehtiyot qismlar va ikki maqsadli mahsulotlar saqlanishi bilan izohlaydi.