Boshpanasiz shaхslarga ijtimoiy yordam koʻrsatiladi
Muayyan yashash joyiga ega boʻlmagan shaхslarga yordam koʻrsatish tizimi oʻzgarmoqda. Sud qarori bilan majburiy joylashtirish oʻrniga ijtimoiy markazlarda iхtiyoriy ravishda boʻlish tartibi joriy etilib, bunda vaqtinchalik uy-joy, ijtimoiy хizmatlar, kasbga oʻqitish va ishga joylashishga koʻmaklashish nazarda tutilmoqda.
Prezidentning 2026-yil 3-avgustdagi PQ–288-sonli “Muayyan yashash joyiga ega boʻlmagan shaxslarga ijtimoiy xizmatlar koʻrsatish tizimini takomillashtirish toʻgʻrisida”gi qarori qabul qilindi. Ushbu qarorga koʻra, boshpanasiz shaxslarga ijtimoiy yordam koʻrsatish tizimi takomillashtiriladi.
**Asosiy maqsadlar:**
* **Markazlarning qayta nomlanishi:** Ichki ishlar organlari qoshidagi muayyan yashash joyiga ega boʻlmagan shaxslarni reabilitatsiya qilish markazlari endilikda "Vaqtinchalik boshpana va ijtimoiy tiklash markazlari" (keyingi oʻrinlarda Ijtimoiy markazlar) deb nomlanadi.
* **Joylashtirish tartibining oʻzgarishi:** 2026-yil 1-sentyabrdan boshlab boshpanasiz shaxslarni Ijtimoiy markazlarga sud qarori asosida joylashtirish amaliyoti bekor qilinadi. Buning oʻrniga, ular oʻz roziliklari bilan joylashtiriladi hamda vaqtinchalik boshpana, oziq-ovqat va shaxsiy gigiyena vositalari bilan taʼminlanadi.
* **Individual yordam:** Ijtimoiy markazlarga joylashtirilgan shaxslar individual rejalar asosida ijtimoiy xizmat va yordamlar bilan qamrab olinadi.
**Ijtimoiy va iqtisodiy reintegratsiya:**
* **Bandlikni taʼminlash:** 2026-yil 1-sentyabrdan boshlab boshpanasiz shaxslar bandligini taʼminlashning yangi tartibi joriy etiladi.
* **Ishsizlik maqomi va kasbga oʻqitish:** 2026-yil 1-oktyabrdan boshlab Ijtimoiy markazlarga joylashtirilgan boshpanasiz shaxslar ishsiz deb eʼtirof etiladi va ularga kasbga oʻqitish uchun vaucherlar ajratiladi.
* **Vaqtinchalik roʻyxatga olish:** Boshpanasiz shaxslar Ijtimoiy markazlarda boʻlgan davrida ushbu muassasaga vaqtinchalik turgan joyi boʻyicha davlat boji toʻlamasdan roʻyxatga olinadi.
Hujjat bilan muayyan yashash joyiga ega boʻlmagan shaxslarni ijtimoiy himoya qilish chora-tadbirlari dasturi tasdiqlandi.
Ushbu qaror Qonun hujjatlari maʼlumotlari milliy bazasida eʼlon qilingan va 2026-yil 4-avgustdan kuchga kirdi.
Lola Abduazimova