Yaponiyada Osiyo oʻyinlari ochildi: Oʻzbekiston 400 ga yaqin sportchi bilan ishtirok etadi
Osiyoning eng yirik sport musobaqasi Yaponiyaning Nagoya shahrida start oldi. Keyingi 16 kun davomida 11 mingga yaqin sportchi 469 ta medal jamlanmasi uchun kurashadi, ular orasida Oʻzbekistonning 396 nafar vakili ham bor.
Yaponiyada Osiyo oʻyinlari boshlandi: Oʻzbekiston qariyb 400 sportchi bilan qatnashadi
19-sentabr kuni Yaponiyaning Nagoya shahrida XX yozgi Osiyo oʻyinlari rasman ochildi. Kelgusi 16 kun davomida, yaʼni 4-oktabrgacha, qariyb 11 ming sportchi 43 ta sport turi boʻyicha 469 ta medal jamlanmasi uchun bahs olib boradi. Yaponiya uchun bu Tokio (1958) va Xirosimadan (1994) keyingi uchinchi Osiyo oʻyinlari hisoblanadi. Mamlakat ushbu musobaqani oxirgi bor 32 yil avval qabul qilgan.
Marosim Mizuho Park (Paloma Mizuho) stadionida boʻlib oʻtdi va taxminan ikki soat davom etdi. Reuters agentligi yozishicha, dastlabki daqiqalar sokin kechgan, keyin esa tomosha yorugʻlik, musiqa va raqs bayramiga aylangan. Besh yil oldin Tokio Olimpiadasi pandemiya sabab boʻsh tribunalar qarshisida oʻtkazilgan boʻlsa, bu safar stadion tomoshabinlar bilan toʻldi.
Oʻyinlarni imperator Naruxito ochiq deb eʼlon qildi. U XOQ prezidenti Kirsti Koventri bilan birga 45 ta mamlakat va mintaqa paradini kuzatdi.
Tomosha mavzusi «Heartbeat» («Yurak urishi») deb nomlandi. Qizil va oq libosdagi ijrochilar «Welcome» (Xush kelibsiz) soʻzini shakllantirishdi, skripkachi Taro Xakase esa jonli ijro etdi.
Eng yuqori lahza mashʼalani yoqish boʻldi: uning oldiga zinapoyadan Osiyo oʻyinlarining besh karra gʻolibi, sobiq bosqon uloqtiruvchi Sigenobu Murofusi va uning oʻgʻli, 2004-yilgi Olimpiya chempioni Koji koʻtarildi. Bungacha olov estafetasi Aichi prefekturasining 40 ta munitsipaliteti va Nagoyaning 16 ta tumanidan oʻtgan edi.
Tayyorgarlik jarayoni ham tanqidlarsiz kechmadi. Alohida olimpiya qishlogʻi oʻrniga sportchilar mehmonxonalarga, vaqtinchalik yogʻoch konteynerlarga va koʻrfazdagi kruiz kemasiga joylashtirildi. Tashkilotchilar buni tejamkorlik bilan izohladi. Delegatsiyalar, jumladan Yaponiya delegatsiyasi ham chalkashliklar va ikki marta bron qilish holatlaridan shikoyat qildi. Janubiy Koreya terma jamoasi Garden Pier portidagi konteynerlarni basketbolchilar uchun juda tor deb atadi. Yana bir noxush holat 8-sentabr kuni yuz berdi: rekord darajadagi jala shaharning bir qismini suv ostida qoldirdi va bir necha yuz sportchi vaqtinchalik binolardan evakuatsiya qilindi. Maʼlumotlarga koʻra, jiddiy talofatlar boʻlmagan.