Shimoliy Koreya Yaponiya mezbonlik qiladigan Osiyo o‘yinlariga 14 sport turi bo‘yicha 100 ga yaqin atlet yuboradi

Shimoliy Koreya joriy yil oxirida Yaponiyada bo‘lib o‘tadigan Osiyo o‘yinlariga 14 ta sport turi bo‘yicha qariyb 100 nafar sportchi yuboradi. Bu haqda mamlakat Olimpiya qo‘mitasi bosh kotibi Tokioda faoliyat yurituvchi nashrga ma’lum qildi.

Shimoliy Koreya va Yaponiya o‘rtasidagi munosabatlar tez-tez keskinlashib turadi. Pxenyan 2021-yilda Tokioda o‘tkazilgan yozgi Olimpiada o‘yinlariga ham delegatsiya yubormagan edi, bunga sabab sifatida o‘sha paytdagi global sog‘liqni saqlash inqirozi ko‘rsatilgan.

Shimoliy Koreya jamoasi avvalgi Osiyo o‘yinlarida bundan ancha ko‘p tarkib bilan qatnashgan. Jumladan, 2023-yilda Xitoyning Xanchjou shahrida o‘tkazilgan musobaqada mamlakat sharafini 18 ta sport turi bo‘yicha 185 nafar sportchi himoya qilgan. Ular 11 ta oltin, 18 ta kumush va 10 ta bronza medalni qo‘lga kiritgan.

Shimoliy Koreya Olimpiya qo‘mitasi bosh kotibi Ko Chol Xo jamoa tarkibi bu safar kichikroq bo‘lishiga qaramay, avvalgi musobaqaga qaraganda ko‘proq medal qo‘lga kiritish umidida ekanini bildirdi.

Pandemiya davrida Pxenyan sportchilarning xorijdagi musobaqalarda ishtirokini keskin cheklagan. Shu sababli Shimoliy Koreya 2022 va 2026-yillardagi qishki Olimpiada o‘yinlarida ham qatnashmagan.

Yaponiyaning Ayti prefekturasidagi Nagoya va boshqa shaharlarda 19-sentyabrdan 4-oktyabrgacha bo‘lib o‘tadigan 20-Osiyo o‘yinlarida 45 davlatdan 11 mingdan ortiq sportchi ishtirok etishi kutilmoqda.

Shuningdek, 2024-yilgi Parij Olimpiadasining ochilish marosimida Janubiy Koreya delegatsiyasi xatolik tufayli Shimoliy Koreya nomi bilan tanishtirilgandi. Tashkilotchilar “Koreya Xalq Demokratik Respublikasi” nomini ikki marta qo‘llab yuborgan, bu esa Seulning keskin noroziligiga sabab bo‘lgan. Xalqaro Olimpiya qo‘mitasi xato uchun Janubiy Koreya delegatsiyasi va mamlakatning tegishli tashkilotlaridan uzr so‘ragan.