Yangilangan Lexus GX harakatlanish uchun aqlli tizimlarga ega boʻldi
Lexus GX yoʻltanlamasini yangiladi. Texnik qismi oʻzgarishsiz qoldi, uskunalar roʻyxati esa yangi elektron funksiyalar bilan toʻldirildi.
Yangilangan Lexus GX harakatlanish uchun aqlli tizimlarga ega bo‘ldi
Lexus GX yo‘ltanlamasi yangilandi.
Model oltita komplektatsiyada taqdim etiladi: Premium, Premium+, Luxury, Luxury+, Overtrail va Overtrail+.
Barcha versiyalar uchun asos sifatida ikkita turbokompressorli 3,4 litrli V6 dvigateli saqlab qolindi. U 349 ot kuchi va 649 N·m aylanish lahzasini ishlab chiqaradi hamda o‘n pog‘onali Direct Shift avtomatik uzatmalar qutisi bilan ishlaydi.
Rasmiy ko‘rsatilgan yonilg‘i sarfi 100 km uchun 11,2 l ni tashkil etadi. Shatakka olinadigan tirkamaning maksimal og‘irligi komplektatsiyaga qarab 4120 kg ga yetadi.
Avtomobil GA-F rama platformasida yaratilgan. Old qismida qo‘sh ko‘ndalang richagli osma, orqa qismida esa ko‘p richagli konstruksiya qo‘llangan. Qo‘shimcha haq evaziga moslashuvchan AVS osmasi taklif etiladi.
Yo‘ltanlamas sharoitlar uchun standart tarzda doimiy to‘liq uzatma va Torsen markaziy differensiali nazarda tutilgan. Overtrail va Overtrail+ versiyalarida qo‘shimcha ravishda elektron boshqariladigan, blokirovkalanadigan orqa differensial bor. Shu komplektatsiyalar E-KDSS tizimi bilan ham jihozlangan bo‘lib, u old va orqa ko‘ndalang barqarorlik stabilizatorlari ishini boshqaradi.
Shuningdek, GX Multi-Terrain Select va Crawl Control tizimlariga ega bo‘ldi. Birinchisi yo‘l qoplamasiga qarab to‘liq uzatmaning ish rejimlarini tanlash imkonini beradi, ikkinchisi esa past tezlikda tortish va tormozlashni avtomatik tarzda sozlaydi.
Barcha versiyalar salonida Lexus Interface multimedia tizimining 14 dyuymli ekrani va 12,3 dyuymli raqamli asboblar paneli o‘rnatilgan. Standart jihozlar tarkibiga simsiz Apple CarPlay va Android Auto hamda o‘nta dinamikli audiotizim ham kiradi.
Komplektatsiyaga qarab GX yetti o‘rinli bo‘lishi mumkin. Ikkinchi qator uchun kapitan kreslolari yoki 60:40 nisbatdagi divan taklif etiladi, uchinchi qator esa elektr yuritma yordamida yig‘ilishi mumkin. Ayrim versiyalarda ikkinchi qator o‘rindiqlari ventilyatsiyali bo‘ladi.