Yangilangan Toyota Land Cruiser 300 gibridi taqdim etildi
Afsonaviy Toyota Land Cruiser 300 gibridga aylandi. Yangilangan model 457 ot kuchiga ega boʻlib, Yaponiyada uning sotuvlari 1-oktabrdan boshlanadi.
Yangilangan Toyota Land Cruiser 300 gibridi namoyish etildi
Toyota kompaniyasi Yaponiyada yangilangan Land Cruiser 300 modelini taqdim qildi. Mahalliy bozorda savdolar 1-oktabrdan boshlanadi. Narxlar 6 300 800 dan 10 200 300 iyenagacha (477 mln - 772 mln soʻm) oraligʻida bo‘ladi.
Asosiy texnik yangilik — gibrid tizim. Avtomobil elektromotor va oʻn pogʻonali «avtomat» bilan uygʻunlashtirilgan 3,5 litrli benzinli V6 dvigateli bilan jihozlangan. Shu kabi agregatlardan premium Lexus LX 700h ham foydalanadi.
Umumiy quvvati 457 ot kuchi va 790 N·m aylanma lahzani tashkil etadi. Bu vazni 170 kg ga oshgan Land Cruiser 300 uchun rekord ko‘rsatkichdir. Kompaniya maʼlumotiga ko‘ra, avtomobil chuqurligi 700 mm gacha bo‘lgan kechuvlardan o‘ta oladi.
3,5 litrli V6 dvigatelli benzinli Land Cruiser 300 ishlab chiqarishdan chiqarildi. Shu tariqa, model uchun ichki yonuv dvigatellaridan endi faqat 307 ot kuchiga ega 3,3 litrli dizel taklif etiladi.
Gibrid Yaponiyada ikkita variantda taqdim etiladi — ZX va GR Sport. Bundan tashqari, avtomobil uchun Modellista tyuning-atelyesidan maxsus paket tayyorlangan bo‘lib, u mashinani sport bamperlari, spoyler, kengaytirilgan qanotlar va yon pog‘onalar bilan bezaydi.