Yamanda husiylarga qarshi umumiy safarbarlik eʼlon qilindi
Yaman rahbariyati husiylarga qarshi kurashni kuchaytirib, fuqarolarni armiya va xavfsizlik kuchlariga qoʻshilishga chaqirdi. Harakatni tark etib, janglarni toʻxtatganlarga toʻliq amnistiya vaʼda qilindi.
Yamanda husiylarga qarshi umumiy safarbarlik eʼlon qilindi
Yaman Prezidentlik boshqaruv kengashi rahbari Rashad al-Alimiy Eron tomonidan qoʻllab-quvvatlanadigan «Ansorulloh» (husiylar) harakatiga qarshi kurashish uchun umumiy safarbarlik eʼlon qildi. U 25-sentabr kuni televideniye orqali qilgan murojaatida fuqarolarni davlat qurolli kuchlari va xavfsizlik organlari safiga qoʻshilishga chaqirdi.
Al-Alimiyning aytishicha, hukumatning maqsadi davlat institutlari faoliyatini qayta tiklash va suverenitetni mamlakatning barcha hududlariga, jumladan, 2014-yilda hukumat nazoratni yoʻqotgan poytaxt Sano shahriga ham yoyishdir. U husiylarni terrorchi militsiya deb atadi. Harakatni tark etib, janglarni toʻxtatganlarga toʻliq amnistiya vaʼda qildi. Uning soʻzlariga koʻra, amnistiya darhol kuchga kiradi, biroq afv etish konstitutsiyaviy va huquqiy tartib-taomillar asosida rasmiylashtirilishi kerak.
Bu bayonot husiylarning mamlakat gʻarbidagi jiddiy muvaffaqiyatlaridan keyin yangradi. Sentabr oyida ular Moxa va Mayun orolini egallab, Qizil dengiz sohilida mustahkam joylashib oldilar. Bu ularga Bob al-Mandib boʻgʻoziga chiqish imkonini berdi va kema qatnovi xavfsizligi borasida xavotirlarni kuchaytirdi. Oʻtgan dam olish kunlari husiylar bir necha yil ichida ilk bor Saudiya Arabistoni poytaxti Ar-Riyozga hujum qildi. Hukumat kuchlari Saudiya Arabistoni aviatsiyasi yordami bilan jang qilmoqda.
AFP maʼlumotiga koʻra, Al-Alimiy prezident Donald Tramp bilan telefon orqali suhbatda Vashingtondan yordam soʻragan. Yana bir holatda, 25-sentabr kuni Saudiya Arabistoni, Turkiya va Pokiston bosh shtab boshliqlari «Makka pakti» uch tomonlama mudofaa shartnomasi doirasidagi ilk uchrashuvni oʻtkazdi.
Al-Hadath telekanali xabariga koʻra, 28-sentabr kuni Yaman parlamenti safarbarlikni rasman eʼlon qilishni maʼqullagan. Hozircha buning boshqa tasdigʻi yoʻq. Safarbarlik muddati, tartibi va toifalari oshkor etilmagan.