Xitoylik mis magnati firibgarlik işi böyiça umrbod qamoq jazosiga hukm qilindi
Xitoyning yirik mis savdosi kompaniyasi Maike Metals International asosçisi Xe Szinbi firibgarlik va poraxörlik kabi jinoyatlarda aybdor deb topilib, umrbod qamoq jazosiga hukm qilindi.
Xitoylik mis magnati firibgarlik ishi bo‘yicha umrbod qamoq jazosiga hukm qilindi
Xitoyning Maike Metals International savdo uyi asoschisi Xe Szinbi firibgarlik va boshqa jinoyatlarga oid ish bo‘yicha umrbod qamoq jazosiga hukm qilindi.
Agentlik suhbatdoshlarining so‘zlariga ko‘ra, Sian shahri sudi sentabr oyida Maike kompaniyasi rahbarini shartnomaviy firibgarlik, poraxo‘rlik va boshqa jinoyatlarda aybdor deb topib, hukm chiqargan. Bloomberg manbalarining ta’kidlashicha, sud kompaniyaning xatti-harakatlari Xitoyning bir necha bankiga 1 milliard dollardan ortiq zarar ko‘rish xavfini tug‘dirganini aniqlagan.
61 yoshli tadbirkor hukm ustidan shikoyat kiritgan. Sud qarorining o‘zi e’lon qilinmagan.
Sud jarayonida himoya tomoni tadbirkor ham, uning kompaniyasi ham firibgarlik qilish niyatida bo‘lmaganini qat’iy ta’kidlagan. Bloomberg xabariga ko‘ra, advokatlar Maike o‘n yildan ortiq vaqt mobaynida banklar bilan hamkorlik qilib kelganini hamda pandemiya cheklovlari tufayli pul oqimlari yomonlashgandan keyin ham majburiyatlarini bajarishga intilib, kreditlarni muntazam ravishda so‘ndirib borganini ko‘rsatib o‘tishgan. Himoya tomonining talqiniga ko‘ra, bank yo‘qotishlarining hech bo‘lmaganda bir qismi kreditorlarning o‘zidagi xavf-xatarlarni boshqarish ichki tizimlarining kamchiliklari bilan bog‘liq bo‘lgan.
Xe Szinbi 1993-yilda Sian shahrida do‘stlari bilan birga 50 ming yuan — o‘sha paytdagi kurs bo‘yicha taxminan 8,7 ming dollar miqdorida kredit olib, Maike kompaniyasiga asos solgan. Kompaniya ishni mexanik va elektrotexnika mahsulotlari savdosidan boshlab, keyinchalik metallolom, mis simlar va tozalangan mis savdosiga o‘tgan. Bloomberg nashrining ta’kidlashicha, kompaniya o‘z rivojlanishining eng yuqori cho‘qqisida Xitoy mis importining to‘rtdan bir qismini ta’minlagan.
Maike o‘zi tashigan va omborlarda saqlagan metallni garovga qo‘yib kreditlar jalb qilgan, shuningdek, mehmonxonalar va biznes markazlariga sarmoya kiritgan. 2022-yilda pandemiya cheklovlari kompaniya faoliyatini izdan chiqardi, Xitoy ko‘chmas mulk bozoridagi inqiroz esa uning investitsiyalariga zarba berdi. Bundan tashqari, mis narxining tushib ketishi moliyaviy qiyinchiliklarni yanada kuchaytirdi.
2023-yil oktabr oyida Maike rahbarlari asoschi bilan aloqani yo‘qotib, uni politsiya hibsga olgan degan taxminga borishdi. Keyingi oyda kompaniya bankrotlik to‘g‘risida ariza berdi.