Trampning ikkinchi muddati boshlanganidan beri AQShda 300 mingdan ortiq viza bekor qilindi
AKShda Trampning ikkinchi muddati boshlanganidan beri 300 mingdan ortiq viza bekor qilindi
AKSh prezidenti Donald Tramp administratsiyasi u ikkinchi muddatini boshlagan 2025 yilning yanvaridan beri 300 mingdan ortiq vizani bekor qildi. Immigratsiya siyosatining kuchaytirilishi nafaqat qonunbuzarlarga, balki ijtimoiy tarmoqlardagi postlari va norozilik namoyishlaridagi ishtiroki hukumatning noroziligiga sabab boʻlgan xorijliklarga ham taʼsir qilmoqda.
20 oktyabr holatiga koʻra bekor qilingan vizalarning umumiy soni 300 mingdan oshgani haqida AKSh Davlat departamenti vakili Tommi Pigott maʼlum qildi.
Uning soʻzlariga koʻra, amaldagi administratsiya buni mamlakat tarixidagi har qanday boshqa administratsiyadan koʻra tezroq amalga oshirmoqda.
Soʻnggi haftalarda vizalarni bekor qilish surʼati oshdi. Avgust oyida Davlat departamenti Trampning ikkinchi muddati boshlanganidan beri 175 mingdan ortiq viza bekor qilingani haqida xabar bergan edi.
Hokimiyat organlari choralarning kuchaytirilishini milliy xavfsizlikni taʼminlash zarurati bilan izohlamoqda. Pigott administratsiya qonunni buzadigan, firibgarlik sodir etadigan yoki AKSh xavfsizligiga tahdid soladigan xorijliklarga nisbatan murosasizlik tamoyiliga amal qilishini aytdi.
Inson huquqlari himoyachilari tegishli huquqiy tartib-omil va soʻz erkinligi huquqining buzilishi xavfini koʻrsatib, hokimiyat harakatlarini tanqid qilmoqda. Bahsli qarorlar orasida — Gʻazo sektoridagi Isroilliklarning harakatlariga qarshi falastinparast norozilik namoyishlarining xorijlik ishtirokchilaridan, shuningdek konservativ siyosiy sharhlovchi Charli Kirkning oʻldirilishi haqida sharhlar joylashtirgan xorijliklardan vizalarning qaytarib olinishi bor.
Bundan tashqari, Kaliforniya Janubiy okrugi federal sudi AKSh Davlat departamentiga roʻyxatdan oʻtish haligacha boshlanmagan DV-2027 grin-karta lotereyasini oʻtkazishni yukladi. Muddatlar qayta koʻrib chiqilgach, idora arizalarni qabul qilishni 1 noyabrdan kechiktirmasdan ochishi, saralash natijalarini esa 3 dekabrgacha eʼlon qilishi kerak.