Tramp uçun murakkab ikki yil boşlanmoqda - The Guardian
Tramp hatto Respublikaçilar partiyasida ham öz taʼsirini yöqotmoqda, deb yozdi naşr.
Tramp uchun og‘ir ikki yil boshlanmoqda — The Guardian
AQShdagi saylov natijalari elektoratning Tramp faoliyatidan norozi ekanini ochiq ko‘rsatdi.
Nashr yozishicha, endi demokratlar prezident va uning ma’muriyati a’zolari faoliyatini tekshirish, shuningdek, Respublikachilar partiyasidan sudyalar tayinlanishiga to‘sqinlik qilish imkoniga ega bo‘ladi. Natijalarning qanchalik ayanchli bo‘lgani esa allaqachon Trampni demokratlar g‘alabasini tan olishga majbur qildi. Garchi AQSh prezidenti mikrofon oldida balandparvoz bayonotlar berib va ijtimoiy tarmoqlarda katta harflar bilan yozib, bu natijalardan shikoyat qilishda davom etishi mumkin bo‘lsa-da, buning biror narsaga ta’sir ko‘rsatishi dargumon.
Nashrning fikricha, uning prezidentlik muddatining keyingi ikki yili avvalgilariga mutlaqo o‘xshamaydi. Ikkinchi prezidentlik muddatining dastlabki oylarida Tramp Amerikada avtoritar rejimni mustahkamlash uchun qo‘lidan kelgan barcha ishni qildi. U federal byurokratiyani «tozalab», u yerga o‘zining sodiq odamlari va «layoqatsiz malaylarini» joylashtirdi. U Kongressdan moliya ustidan nazoratni tortib oldi. Nashrga ko‘ra, dastlabki ikki yil davomida Tramp odamlarni o‘ziga bo‘ysundirish uchun barcha choralarni ko‘rishga uringan. Biroq saylov natijalari u buning uddasidan chiqa olmaganini ko‘rsatdi.
Tramp 2027-yilga o‘ziga dushman kayfiyatdagi Kongress, ma’qullash reytingining keskin pasayishi va vakolat muddati cheklovi bilan kirib boradi. Bundan tashqari, Trampni Erondagi urush fonida yuzaga kelgan bo‘linish sababli o‘z partiyasida ham qiyinchiliklar kutmoqda. Respublikachilarning bir qismi esa o‘z kelajagini mustahkamlashga urinib, unga qarshi bosh ko‘tara boshlaydi, deb hisoblaydi nashr.
«Trampning kuchi doimo uning respublikachilar elektorati ustidan go‘yoki cheksizdek ko‘ringan hokimiyatiga asoslangan edi. Uning xarizmasi saylovchilarni uning ortidan istalgan joyga ergashishga majbur qila olishida edi. Seshanba oqshomida demokratlar erishgan g‘alabalardan xulosa qiladigan bo‘lsak, odamlar endi uning ortidan ergashmayapti», – deb xulosa qildi nashr.
Xususan, respublikachilarning saylovdagi mag‘lubiyati Trampni xalqaro maydonda yanada faolroq harakat qilishga undashi mumkin. Nashrning fikricha, ko‘proq tinchlik bitimlari tuzishga intilish, shuningdek, dunyo diktatorlari bilan uchrashuvlardan tashqari, Tramp Eron bilan urushni kuchaytirishi yoki hatto yangi mojarolarni boshlashi mumkin.