Tramp respublikachilarning saylovdagi mag‘lubiyatini Eron bilan bog‘ladi
AQSH prezidenti Eron bilan urush saylov natijalariga qisman ta’sir qilganini tan oldi. Biroq u respublikachilarning mag‘lubiyatini o‘zining siyosiy muvaffaqiyatsizligi deb hisoblamayapti.
**Tramp respublikachilarning saylovdagi mag‘lubiyatini Eron bilan bog‘ladi**
AQSH prezidenti Donald Tramp respublikachilarning Kongress saylovlaridagi mag‘lubiyatiga Eron bilan urush ham sabab bo‘lganini tan oldi.
Respublikachilarning saylovdagi muvaffaqiyatsiz natijalariga urush ta’sir qildimi, degan savolga Tramp: “Bunda Eronning ham hissasi bor”, deb javob berdi.
Shu bilan birga, AQSH prezidenti Eronga qarshi urush boshlaganidan afsuslanmasligini aytdi: “Bu haqda o‘ylamayman. Men to‘g‘ri ish qildim. Yana shunday qilgan bo‘lardim”.
Uning fikricha, asosiy siyosiy muammo urush emas, balki neft narxining oshgani. Tramp amerikaliklar uning prezidentlik faoliyatidan norozi bo‘lgani uchun respublikachilar saylovda yutqazdi, degan fikrga qo‘shilmasligini bildirdi.
“Natijani o‘z mag‘lubiyatim sifatida ko‘rayotganim yo‘q. Saylov byulletenida mening ismim bo‘lmagan”, dedi u.
Tramp saylov natijalaridan so‘ng hukumat tarkibida kadrlar almashinuvi bo‘lmasligini ma’lum qildi. Shuningdek, u mudofaa vaziri Pit Xegsetni qo‘llab-quvvatlab, uning faoliyatini yuqori baholadi.
Tramp Fox News telekanaliga bergan intervyusida Kongress saylovlarining dastlabki natijalaridan “biroz hayratda qolganini” aytgan. Shu bilan birga, u demokratlarning g‘alabasini tan olishga tayyorligini bildirgan.
Nashrga ko‘ra, prezident yaqinlaridan mudofaa vaziri Pit Xegset va general Den Keynning faoliyati haqida surishtira boshlagan. Tramp atrofidagi ayrim shaxslar Xegset urushdagi haqiqiy vaziyatni prezidentga to‘liq yetkazmagan bo‘lishi mumkinligini taxmin qilgan. Ularning fikricha, vazir Trampga yoqish uchun harbiy amaliyotlar haqida haddan tashqari ijobiy hisobotlar bergan.
**Saylov natijalari**
3-noyabr kuni AQSHda Kongressga oraliq saylovlar bo‘lib o‘tdi. Demokratlar Vakillar palatasi va Senatda ko‘pchilikni qo‘lga kiritib, respublikachilarni mag‘lub etdi. Associated Press ma’lumotlariga ko‘ra, demokratlar Vakillar palatasida kamida 228 ta o‘rinni egallagan. Shuningdek, ular Senatda respublikachilarga tegishli bo‘lgan kamida yettita o‘rinni qo‘lga kiritgan. Ovozlarni sanash davom etmoqda.