Tramp Eronga qarshi urushga sarflangan 30 mlrd dollarni “arzimas pul” deb atadi
AQSH prezidenti Vashington Tehron bilan keng ko‘lamli urush olib bormayotganini va mojaroni istalgan vaqtda yakunlashi mumkinligini aytdi. Biroq OAV AQSH Eronga yashirin zarbalar berishda davom etayotgani haqida xabar bermoqda.
Tramp Eronga qarshi urushga sarflangan 30 mlrd dollarni “arzimas pul” deb atadi
AQSH prezidenti Donald Tramp Eron bilan harbiy ziddiyat uchun sarflangan 30 milliard dollarni “arzimagan pul” deb atadi va Vashington bu mojaroni istalgan paytda tugatishi mumkinligini aytdi. U bu haqda Fox News boshlovchisi Shon Xennitiga bergan intervyusida so‘zladi.
“Bu arzimas pul, chunki biz Venesuelaning o‘zidan bundan bir necha barobar ko‘p daromad oldik”, — dedi Tramp mojaro xarajatlari haqidagi savolga javoban.
AQSH prezidenti Eron bilan ziddiyatni “yumshoq urush” deb ta’rifladi. Uning aytishicha, AQSH keng ko‘lamli harbiy amaliyotlar olib bormayapti. Tomonlar bir necha oydan beri bir-biriga zarba bermagan, Vashington esa Tehron bilan muzokaralarni davom ettirmoqda.
Shu bilan birga, 3-noyabr kuni Amerika OAVlari AQSH Eron janubidagi Keshm oroliga hujum qilgani haqida xabar berdi. The Wall Street Journal ma’lumotiga ko‘ra, AQSH bir necha oydan beri Eronga kichik ko‘lamli yashirin zarbalar berib kelmoqda, biroq ularni rasman tasdiqlamayapti. CNN manbasining aytishicha, Amerika hukumati vaziyat ko‘lamini oshirib ko‘rsatmaslik uchun hujumlar haqidagi ma’lumotlarni ataylab yashirmoqda.
2-noyabr kuni amerikalik jurnalist Taker Karlson Isroil bosh vaziri Binyamin Netanyaxu Trampga bosim o‘tkazayotgani va AQSH yaqin kunlarda Eronga yadroviy zarba berishi mumkinligini aytdi. Uning da’vosiga ko‘ra, Tramp 7-noyabrgacha bu masalada qaror qabul qilishi mumkin.