Toshkentning Glinka koʻchasida asfalt ostida yuz bergan portlash sabablarini rasmiylar aniqlamoqda

Toshkentning Glinka koʻchasida asfalt ostida yuz bergan portlash sabablarini rasmiylar oʻrganmoqda

Payshanba kuni Toshkent shahrining Glinka koʻchasida yoʻl qoplamasi ostida yuz bergan portlash sabablari aniqlanmoqda, deya xabar berdi Yakkasaroy tumani hokimligi matbuot xizmati. Tuman hokimi Nilufar Allabergenova voqea joyida boʻlib, hodisa oqibatlarini koʻzdan kechirdi.

Hokimlikdan eslatishlaricha, yaqinda Glinka koʻchasida eskirgan muhandislik tarmoqlarini yangilash va quvurlarni almashtirish ishlari olib borilgan edi. Yangi quvurlar mustahkamlik va ishga yaroqlilikka tekshirilgan, biroq tarmoqlar hali foydalanishga topshirilmagan edi.

Ijtimoiy tarmoqlarda eʼlon qilingan videolarda portlashga oʻxshash ovoz eshitiladi, soʻngra voqea joyi ustida chang koʻtarilgani koʻrinadi.

«Gazeta»ning xabar berishicha, yoʻlning ushbu qismida asfalt oʻpirilib tushgan, uning parchalari esa oʻnlab metr masofaga uchib ketgan. Oʻtib ketayotgan bir nechta mashina shikastlangan, rasman bir nafar jabrlanuvchi haqida xabar berilgan. Hozirda avariya oqibatlarini bartaraf etish ishlari olib borilmoqda. Koʻchaning ushbu qismi yopilgan, haydovchilardan uni aylanib oʻtish soʻralmoqda.

«Gazeta» oʻquvchisi Glinka koʻchasining avgust oyi boshida, u yerda taʼmirlash ishlari olib borilayotgan vaqtda olingan fotosuratlarini yubordi. Oʻrnatilgan toʻsiqda Industrial Construction deb yozilgan.

Toshkentning issiqlik, suv va gaz taʼminoti korxonalari ushbu hodisa tarmoqlar bilan bogʻliq emasligini maʼlum qildi.

Poytaxtning issiqlik taʼminoti tarmoqlariga xizmat koʻrsatuvchi Veolia Energy Tashkent kompaniyasi kechqurun issiqlik taʼminoti quvurlari shikastlanmagani va butun ekanini, joriy yilda oʻrnatilgan, uzunligi 1240 metr boʻlgan magistral esa boʻsh holatda (suvsiz va bosimsiz) ekanini maʼlum qildi.

«Shu tariqa, hodisa issiqlik taʼminoti tarmoqlaridan foydalanish yoki ularning yorilishi bilan bogʻliq emas», — deya taʼkidladi kompaniya.