Toshkentda Ilmiy-ammaliy forum 2026 bo‘lib o‘tdi
10-oktabr kuni Toshkentda EAS Company tomonidan tashkil etilgan Ilmiy-amaliy forum 2026 bo‘lib o‘tdi. Unda uchuvchisiz tizimlar va radioelektron kurash texnologiyalarining rivojlanishi muhokama qilindi, shuningdek, muhandislik va IT yo‘nalishlaridagi talabalar loyihalari tanlovi yakunlari sarhisob qilindi.
Toshkentda Ilmiy-amaliy forum 2026 o‘tkazildi
10-oktabr kuni Toshkent shahridagi Inha universiteti konferensiya zalida Electronic Autonomous Solutions (EAS Company) tomonidan tashkil etilgan Ilmiy-amaliy forum 2026 bo‘lib o‘tdi. Tadbir texnologiya sohasi vakillari, ilmiy hamjamiyat, tegishli idoralar mutaxassislari va talabalarni bir maydonga jamlab, uchuvchisiz tizimlar, radioelektronika va avtonom navigatsiya yo‘nalishlaridagi zamonaviy ishlanmalarni muhokama qilish imkonini berdi.
Forumning asosiy mavzularidan biri radioelektron kurashning zamonaviy usullari hamda uchuvchisiz uchish apparatlariga qarshi kurashish texnologiyalari bo‘ldi. Ishtirokchilar uchuvchisiz texnologiyalarning rivojlanishi bilan bog‘liq dolzarb texnik masalalarni, shuningdek, ulardan foydalanishning ishonchliligi, xavfsizligi va samaradorligini oshirishga qaratilgan muhandislik yechimlarini muhokama qildi.
Forum doirasida mahalliy va xorijiy ekspertlar ishtirokida ikkita yalpi sessiya tashkil etildi.
Forumning asosiy ma’ruzachilaridan biri EAS Company boshqaruvi raisining o‘rinbosari va bosh muhandisi Bexzod Sulaymonov bo‘ldi. U o‘z ma’ruzasida radioelektron kurash va uchuvchisiz tizimlarga qarshi kurashish (C-UAS) bo‘yicha zamonaviy usul va vositalarni taqdim etdi. Ma’ruzada uchuvchisiz apparatlardan kelib chiqishi mumkin bo‘lgan tahdidlarni aniqlash va ularga qarshi kurashish texnologiyalariga alohida e’tibor qaratildi.
Hasan Xankeldiyev Toshkent shahridagi Korzinka tarmog‘i filiallari o‘rtasida dronlar yordamida yuk yetkazib berish marshrutlarini optimallashtirish usullari haqida ma’ruza qildi. Unda samarali yo‘nalishlarni hisoblashda sayohatchi sotuvchi masalasi (TSP) va MATLAB dasturiy ta’minotidan foydalanish imkoniyatlari ko‘rib chiqildi.
Minhaz Uddin Ahmed uchuvchisiz uchish apparatlari uchun xalaqitlarga chidamli aloqa kanallari va radio orqali boshqaruv tizimlariga bag‘ishlangan ma’ruza bilan qatnashdi. Unda radioelektron xalaqitlar sharoitida uchuvchisiz uchish apparatlarini barqaror boshqarish imkonini beruvchi texnik yechimlarga alohida e’tibor qaratildi.
Petr Xmarskiy manevr qiluvchi uchuvchisiz apparatlarning harakatini kuzatish va prognozlash uchun koordinata ma’lumotlarini ko‘p gipotezali qayta ishlash usullari haqida so‘z yuritdi. Taqdim etilgan yondashuvlar havo obyektlarini kuzatish va ularning harakatini tahlil qilish tizimlarini takomillashtirishda muhim ahamiyatga ega.
Forumning alohida yo‘nalishlaridan biri yosh muhandislar va IT mutaxassislarini qo‘llab-quvvatlash bo‘ldi. Talabalar tanlovi Robotics Lab Future Technology Company bilan hamkorlikda tashkil etilib, “Muhandislik” va “IT” yo‘nalishlari bo‘yicha o‘tkazildi.
Tanlovning birinchi bosqichi 9-oktabr kuni Inha universitetida bo‘lib o‘tdi. Tanlovga 10 ta loyiha taqdim etildi va ekspertlar komissiyasi ularning orasidan uchta eng yaxshi loyihani saralab oldi.
10-oktabr kuni Robotics Lab platformasida tanlovning navbatdagi bosqichi bo‘lib o‘tdi. Uning yakunlariga ko‘ra, yana uch nafar g‘olib aniqlandi. Shu tariqa, ikki bosqich natijalariga ko‘ra, jami olti nafar ishtirokchi g‘olib deb topildi.
Loyihalar Robotics Lab, EAS Company, Inha universiteti va tegishli idoralar vakillaridan iborat ekspertlar hay’ati tomonidan baholandi. Muhandislik yo‘nalishida ishtirokchilar o‘z ishlanmalarini taqdim etib, ekspertlar hay’ati oldida himoya qildilar. IT yo‘nalishida esa natijalar kompyuter test sinovlari asosida aniqlandi.
Olti nafar g‘olibning barchasi diplomlar, sertifikatlar va sovg‘alar bilan taqdirlandi. Bundan tashqari, ularga EAS Company’da stajirovka o‘tash imkoniyati taklif qilindi. Ushbu tashabbus istiqbolli yosh mutaxassislarni qo‘llab-quvvatlash va ularning bilimlarini amaliy texnologik loyihalarda qo‘llashlari uchun sharoit yaratishga qaratilgan.
Ilmiy-amaliy forum 2026 texnologik biznes, ilmiy hamjamiyat va ta’lim sohasi vakillari o‘rtasida tajriba almashish uchun muhim maydonga aylandi. Forum sohaning dolzarb vazifalarini muhokama qilish, muhandislik ishlanmalarini taqdim etish hamda amaliy tajribaga ega mutaxassislar va yosh tadqiqotchilar o‘rtasidagi hamkorlikni mustahkamlash imkonini berdi.
Tadbir doirasida Electronic Autonomous Solutions aksiyadorlik jamiyati boshqaruvi raisi Azizbek Ubaydullayev ishtirokchilarga tabrik so‘zi bilan murojaat qildi. Shuningdek, Inha universiteti rektori Bobur Abdullayev ham forum ishtirokchilarini qutladi.
EAS Company uchun forumni tashkil etish professional hamjamiyat bilan muloqotni rivojlantirish, muhandislik tashabbuslarini qo‘llab-quvvatlash va bo‘lajak mutaxassislarni tayyorlashga ko‘maklashish imkoniyatidir.
EAS Company uchuvchisiz uchish apparatlarini aniqlash, monitoring qilish va ularga qarshi kurashishga mo‘ljallangan integratsiyalashgan yechimlarni ishlab chiqishga ixtisoslashgan. Kompaniya o‘z faoliyatida radiochastota spektrini tahlil qilish, avtomatlashtirish va sun’iy intellekt texnologiyalaridan foydalanadi.