Toshkentda Finobod 2026 xalqaro fintex forumi bo‘lib o‘tadi
12−14-noyabr kunlari Toshkentda Finobod 2026 xalqaro fintex forumi bo‘lib o‘tadi. Uch kun davomida davlat, biznes va texnologiya sohasi vakillari fintexni rivojlantirish, investitsiyalar, sun’iy intellekt va yangi raqamli yechimlarni muhokama qiladi.
Toshkentda 12-14-noyabr kunlari CAEX Uzbekistan majmuasida "Finobod 2026" Toshkent Fintex Xalqaro Forumi bo‘lib o‘tadi.
O‘zbekistonning raqamli ekotizimi strategiya amalga oshirilishiga olti yil to‘lmasdan sezilarli darajada kengaydi. Bugungi kunda IT Park Uzbekistan hududida 3500 dan ortiq kompaniya, jumladan, xorijiy kapital ishtirokidagi 1095 ta kompaniya faoliyat yuritmoqda. Faqatgina 2026-yilning birinchi yarmida ekotizimga 608 ta eksportga yo‘naltirilgan va 297 ta xorijiy sarmoya ishtirokidagi kompaniya qo‘shildi. Hozirda IT Park rezidentlari 102 mamlakatga IT xizmatlari va raqamli mahsulotlar eksport qilmoqda.
Prezidentning PF-6079-sonli farmoniga ko‘ra, 2030-yilga borib raqamli iqtisodiyotning yalpi ichki mahsulotdagi ulushini 10 foizga, IT xizmatlarining yillik eksportini esa 5 milliard dollarga yetkazish maqsad qilingan.
Finobod forumi raqamli rivojlanishning keyingi bosqichini belgilab beruvchi ishtirokchilarni – regulyatorlar, moliya institutlari, texnologik kompaniyalar, investorlar va tadbirkorlarni, shuningdek, sanoat, agrosanoat majmuasi, avtomobilsozlik, energetika, transport va logistika, telekommunikatsiya, chakana savdo va elektron tijorat, qurilish, tibbiyot hamda aerokosmik soha kabi muhim tarmoqlarda biznesni raqamli transformatsiya qilish bo‘yicha yetakchilarni birlashtiradi. Tadbirning ishbilarmonlik dasturida P10 Global Technology, Kaspersky, Moskva birjasi, VTB banki, SQB, Geointellect Uzbekistan va boshqa xalqaro hamda mintaqaviy o‘yinchilarning vakillari ishtirok etadi.
Forum tashkilotchilari SAYS va MAXIFORUM kompaniyalaridir.
12-noyabr forumning strategik kuni bo‘lib, uning asosiy mavzusi "Raqamli O‘zbekiston: mahalliy raqamlashtirishdan global raqobatbardoshlik sari" deb nomlanadi. Ishtirokchilar "Raqamli O‘zbekiston – 2030" strategiyasini amalga oshirish, raqamli infratuzilmani rivojlantirish hamda O‘zbekistonni xalqaro raqamli biznes uchun mintaqaviy joziba markaziga aylantirish imkoniyatlarini muhokama qiladilar. Muhokama qilinadigan mavzular orasida banklar va to‘lov platformalari, raqamli infratuzilma, sun’iy intellekt, kiberxavfsizlik, shuningdek, kosmik texnologiyalardan tijoriy foydalanish masalalari bor. Xususan, alohida sessiya sun’iy yo‘ldosh ma’lumotlari va geoaxborot yechimlarini qishloq xo‘jaligi, logistika, moliya va sug‘urta sohalarida qanday qo‘llash mumkinligiga bag‘ishlanadi.
13-noyabr kuni asosiy e’tibor biznes va texnologiyalarning iqtisodiy samarasiga qaratiladi. Bu kun "Kelajak biznesi: avtomatlashtirish, investitsiyalar va inson sun’iy intellekt davrida" mavzusiga bag‘ishlanadi. Dasturdan o‘rin olgan mavzular: innovatsiyalarga investitsiyalar, sun’iy intellekt va avtomatlashtirish, transchegaraviy to‘lovlar, yangi mintaqaviy to‘lov koridorlari, kiberxavfsizlik va fintexni rivojlantirish.
14-noyabrda forum amaliy hamkorlik formatida davom etadi. Bu kun to‘lig‘icha barcha xohlovchilar bepul tashrif buyurishi mumkin bo‘lgan Finobod Expo texnologik va moliyaviy yechimlar ko‘rgazmasiga bag‘ishlanadi. Mehmonlar zamonaviy texnologiyalarning amalda qanday qo‘llanilishini ko‘radilar, ishtirokchilarning yechimlari bilan tanishadilar va yangi ishlanmalar haqida ko‘proq ma’lumotga ega bo‘ladilar. Professional auditoriya uchun esa parallel ravishda B2B uchrashuvlari va ishtirokchilarning stendlariga biznes tashriflar uyushtiriladi. Shu bilan birga, uch kun davomida ko‘rgazma ekspozitsiyasi, B2B Matchmaking, startaplar xiyoboni, VIP Lounge va media markaz faoliyat ko‘rsatadi.
Finobod – bu xalqaro kapital, texnologiyalar, davlat va biznes uchrashadigan maydon.