Toshkentda 151 xonalik NH Hotels mehmonxonasi ochiladi

Toshkentda 151 xonali NH Hotels mehmonxonasi paydo boʻladi

Minor Hotels xalqaro mehmonxonalar guruhi Oʻzbekiston poytaxtida NH Tashkent mehmonxonasini ochish boʻyicha franchayzing shartnomasini tuzdi. Vobʼyektni ishga tushirish 2027 yilning boshiga moʻljallangan.

Imzolash marosimi 2026 yil 4 noyabr kuni boʻlib oʻtdi.

Tadbirda Oʻzbekiston Turizm qoʻmitasi raisi oʻrinbosari Sanjar Tajiyev, shuningdek, Minor Hotels va NH Hotels & Resorts brendi rahbariyati vakillari ishtirok etdi.

Mehmonxona 151 ta xonani, jumladan, standart xonalar, Junior Suite va Deluxe xonalarini oʻz ichiga oladi. Mehmonlar uchun milliy va xalqaro taomlar restorani, sport zali hamda ishbilarmonlik uchrashuvlari, xalqaro konferentsiyalar va boshqa tadbirlar uchun anjumanlar zali koʻzda tutilgan.

Sanjar Tajiyev taʼkidlaganidek, xalqaro mehmonxona operatorlari bilan hamkorlik Oʻzbekiston uchun global bron qilish platformalari, korporativ mijozlar va xalqaro sotuv kanallariga kirishni kengaytiradi. Bu ishbilarmonlik va tadbirlar turizmini rivojlantirishga, xorijiy mehmonlarni jalb qilishga, yangi ish oʻrinlarini yaratishga va turistik xizmatlar eksportining oʻsishiga xizmat qilishi kutilmoqda.

NH Tashkent’ning ochilishi poytaxtda xalqaro darajadagi mehmonxona xizmatlari taklifini kengaytiradi hamda xizmat safarlari va MICE-turizm uchun infratuzilmani mustahkamlaydi.

Turizm qoʻmitasi maʼlumotlariga koʻra, Oʻzbekistonda 32 ta xalqaro mehmonxona brendi faoliyat yuritmoqda, ularning boshqaruvi ostida 52 ta mehmonxona mavjud.

NH brendi tarixi 1978 yilda Ispaniyada birinchi mehmonxonaning ochilishi bilan boshlangan. Bugungi kunda NH Hotels & Resorts tarmogʻi 25 ta mamlakatdagi 201 ta mehmonxona va kurortni birlashtiradi.

Minor Hotels xalqaro guruhi olta qitʼada 560 dan ortiq mehmonxona obʼyektlarini boshqaradi. Uning portfeliga, shuningdek, Anantara, Avani, NH Collection, nhow, Oaks va Tivoli brendlari kiradi.