Toshkent va Buxoroda kuchli taʼsir qiluvchi dori vositalari savdosi bilan shugʻullanuvchilar qoʻlga olindi
Toshkent va Buxoroda kuchli taʼsir qiluvchi dori vositalari savdosi bilan shugʻullanuvchilar qoʻlga olindi
Toshkent shahri va Buxoro viloyatida bojxona organlari kuchli taʼsir qiluvchi dori vositalarining noqonuniy aylanmasiga chek qoʻydi. Bir holatda turar joy yertoʻlasidan pregabalin moddasi boʻlgan mingdan ortiq tabletka topilgan boʻlsa, boshqa bir holatda erkak kishi gabapentin moddasi boʻlgan dorilarni sotishga uringan vaqtida qoʻlga olindi.
Toshkent shahri Yunusobod tumanida yashovchi 47 yoshli fuqaroning xonadonida oʻtkazilgan tezkor tadbir Bojxona qoʻmitasining Kontrabandaga qarshi kurashish boshqarmasi xodimlari tomonidan DXX bilan hamkorlikda amalga oshirildi.
Yertoʻla koʻzdan kechirilganda, huquq-tartibot idoralari xodimlari 84 quti «Regapen» preparatini — qariyb 1,2 ming dona tabletkani aniqladilar. Dori vositalari olib qoʻyildi.
Markaziy bojxona laboratoriyasi ekspertizasi preparat tarkibida 352,5 gramm kuchli taʼsir qiluvchi pregabalin moddasi borligini tasdiqladi. Amaldagi qoidalarga koʻra, ushbu moddaning 10 grammdan ortigʻi yirik miqdor hisoblanadi va jinoiy javobgarlikka sabab boʻladi.
Yana bir holat Buxoro viloyatining Gʻijduvon tumanida yuz berdi. Viloyat bojxona boshqarmasi tezkor tarkibiy tuzilmalari xodimlari 204 dona «Gabaten» tabletkasini 1,6 ming dollarga sotishga uringan erkakni qoʻlga oldi. Preparat tarkibida ham kuchli taʼsir qiluvchi modda — gabapentin borligi aniqlandi.
Har ikki holat boʻyicha jinoyat ishi qoʻzgʻatildi. Tergov harakatlari olib borilmoqda.
Bundan avval Sirdaryoda Spark yoʻlovchisidan yarim ming dona pregabalin kapsulasi topilgan edi.