Toshkent issiqxonalariga imtiyozli shartlarda Surxondaryoga koʻchib oʻtish taklif etiladi
Toshkent issiqxonalariga imtiyozli shartlarda Surxondaryoga koʻchib oʻtish taklif etiladi
Toshkent va Toshkent viloyatidagi issiqxona xoʻjaliklarini Surxondaryo viloyatidagi «Surxon-Agro» erkin iqtisodiy zonasiga koʻchirish rejalashtirilmoqda. Oʻz xoʻjaliklarini u yerga koʻchirishga qaror qilgan tadbirkorlarga auktsionlarda yer uchastkalarining boshlangʻich narxini normativ qiymatining 1 foizigacha kamaytirish taklif etildi.
Bundan tashqari, ularga soliq imtiyozlari berish va olib kirilayotgan uskunalarni bojxona bojlaridan ozod qilish imkoniyati koʻrib chiqilmoqda.
Issiqxonalarni qulay iqlim sharoitiga ega hududlarga koʻchirish masalasini prezident Shavkat Mirziyoyev issiqxonachilik sohasiga «yashil» texnologiyalarni joriy etishga bagʻishlangan taqdimotda koʻrib chiqdi. Surxondaryo viloyatining Sherobod tumanida joylashgan «Surxon-Agro» zonasi uchun allaqachon 940 gektar yer ajratildi va master-plan tayyorlandi.
Taklifga koʻra, auktsionlarda yer uchastkalarining boshlangʻich narxi normativ qiymatning 10 foizini tashkil etadi. Qiymati 10 million dollardan ortiq boʻlgan loyihalar, shuningdek, Toshkent va Toshkent viloyatidan issiqxonalarni koʻchirayotgan tadbirkorlar uchun ushbu koʻrsatkichni 1 foizgacha kamaytirish taklif qilindi.
Zona ishtirokchilari uchun yer ijara toʻlovining nol stavkasi besh yil muddatga belgilandi, shuningdek, kanalizatsiya va yer osti suvlaridan foydalanganlik uchun toʻlovlar boʻyicha uch yillik imtiyozlar nazarda tutilgan. Bundan tashqari, ularni besh yil muddatga yer va mol-mulk soliqlaridan, shuningdek, foyda soligʻidan ozod qilish taklif etildi. Import qilinadigan issiqxona uskunalari uchun ham bojxona bojlarini bekor qilish taklif qilindi.
400 gektar maydonda investorlarga tayyor loyihalar shaklida taklif etiladigan issiqxonalar va agrologistika obʼyektlarini joylashtirish rejalashtirilmoqda. Zona infratuzilmasini rivojlantirishga 220 milliard soʻm, loyihalarni moliyalashtirishga yana 200 milliard soʻm yoʻnaltirilishi koʻzda tutilgan. 2027 yilda zonaga 100 million dollar investitsiya jalb etish rejalashtirilmoqda.
Shuningdek, Toshkent va unga tutash beshta tumandagi issiqxona xoʻjaliklari ekologik toza energiya manbalariga oʻtishi kerakligi xabar qilinmoqda. Qattiq yoqilgʻidan foydalanadigan korxonalar uchun oʻtish muddatini 2026 yil 1 dekabrgacha belgilash taklif etildi. 15 oktyabrdan 15 martgacha issiqxonalarning chiqarindilari real vaqt rejimida kuzatib boriladi, qoidabuzarliklar uchun esa ularning faoliyatini toʻxtatib qoʻyish imkoniyati nazarda tutilgan.