Toshkent hokimligi kun sovisa, issiqlik ta’minotini berishni “kechiktirmaslikka” va’da berdi
Toshkent hokimligida aholining issiqlik ta’minotini yoqish muddatlari bo‘yicha savollariga javob berildi. Qoidaga ko‘ra, o‘rtacha kunlik harorat ketma-ket besh kun +8 darajadan past bo‘lishi kerak. Ammo shahar ma’muriyati amaldagi ob-havoni inobatga olish va kun qattiq sovisa, buni kechiktirmaslik niyatida.
Toshkent hokimligi havo sovisa, issiqlik ta’minotini yoqishni “kechiktirmaslikka” va’da berdi
Toshkent shahar hokimligida so‘nggi paytlarda aholi tomonidan ko‘p berilayotgan markazlashgan isitish tizimi qachon ishga tushirilishi haqidagi savolga izoh berildi.
Hokimlik fuqarolarning xavotirini tushunishini bildirdi: “Havo sovishi bilan xonadonlar salqinlashadi, shu sababli ko‘pchilik isitish mavsumi boshlanishini kutmoqda. Murojaatlaringizni ko‘rib turibmiz va uyda issiq hamda qulay muhit bo‘lishi qanchalik muhimligini tushunamiz”.
Hokimlik eslatishicha, belgilangan tartibga ko‘ra, mavsumni boshlash mezoni — o‘rtacha kunlik haroratning ketma-ket besh kun davomida Selsiy bo‘yicha +8 darajadan past bo‘lishidir.
Shunga qaramay, o‘tgan yillardagidek, rasmiylar “amaldagi ob-havoni hisobga oladi va agar kunlar sovishi taqozo etsa, qaror qabul qilishni kechiktirmaydi”.
Ayni paytda shahar xizmatlari va Veolia Energy Tashkent kompaniyasi bilan birga tizimlarni isitish mavsumiga tayyorlash ishlari olib borilmoqda.
O‘tgan yili hokimlik harorat +8 darajadan pasayishini kutib o‘tirmasdan, 3-noyabrdan ijtimoiy soha obyektlarida, 5-noyabrdan esa turar joylarda isitish tizimini ishga tushirgan edi.
Avvalroq O‘zbekistonda amaldagi ushbu qoidani bekor qilish masalasi bir necha bor ko‘tarilgan.
Unda Gazeta kolumnisti Erkin Abdulahatov bu qoida Sovet davridan qolganini aytib o‘tgandi.
O‘zbekiston Vazirlar Mahkamasining 2014-yil 15-iyuldagi “Kommunal xizmatlar ko‘rsatish qoidalarini tasdiqlash to‘g‘risidagi” 194-son qarori 13-bandi keltirilgan. Unda, jumladan, shunday deb yoziladi:
“Xonalarni isitish ehtiyojlari uchun issiqlik energiyasini berishda Yetkazib beruvchi isitish davrini Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan belgilangan muddatlarda boshlaydi va tamomlaydi. Isitish davri tashqi havoning o‘rtacha sutkalik harorati 8⁰Sdan past bo‘lgan 5 kunlik davr tamom bo‘lgan kundan keyingi kundan boshlanishi, 8⁰S yuqori bo‘lganda esa tamomlanishi kerak”.
Oddiy qilib aytganda, havo harorati ketma-ket 5 kun Selsiy bo‘yicha o‘rtacha 8 daraja iliqdan past bo‘lsa, isitish davri boshlanishi kerak. Bu sovet davridan qolgan qoida bo‘lib, xususan, O‘zSSR hukumatining 1985-yil 30-sentabrdagi 497-son qarori bilan tasdiqlangan qoidalarning 32-bandida mustaqil O‘zbekistonning 2014-yilgi qarori bilan tasdiqlangan Qoidalaridagi kabi gap yozilgan.
“Aslida bu qoida o‘tgan asrning 60−70 yillarida, fasllar bir-biriga o‘z o‘rnini ma’lum bir uzviylikda bo‘shatgan, havo harorati bugungidek „karusel“ misoli o‘ynab ketmagan davrlarda ishlab chiqilgan”, — deya yozgandi iqlimshunos.