Toshkentda yomg‘irdan oldin qisqa muddatli chang-to‘zonlar kuzatilishi mumkin
Yakshanba kuni Toshkentda yomg‘ir yog‘ishi oldidan qisqa muddatli chang-to‘zon ko‘tarilishi mumkin. Maxsus komissiya shamol 14 m/s gacha kuchayib, havoda PM10 chang zarrachalari ortishidan ogohlantirdi.
Toshkentda yomg‘irdan avval qisqa muddatli chang-to‘zonlar kuzatilishi mumkin
4 oktbyar kuni Toshkent shahrida yomg‘ir boshlanishidan oldin qisqa muddatli chang-to‘zon hodisalari yuzaga kelishi ehtimoli bor, deya shaharda ekologik vaziyatni yaxshilash bo‘yicha tuzilgan maxsus komissiya ogohlantirmoqda.
Global ob-havo modellari hamda O‘zgidromet prognozlariga ko‘ra, poytaxt hududiga nam havo massalari kirib kelishi kutilmoqda. Shu sabab shamol tezligi 3−8 m/s gacha, ayrim hududlarda esa 10−14 m/s gacha kuchayishi mumkin.
Shamolning kuchayishi natijasida ayrim joylarda chang-to‘zonlar ko‘tarilib, atmosfera havosidagi chang zarrachalari, xususan, PM10 konsentratsiyasi qisqa muddatga oshishi ehtimoli mavjud.
“Hozirda atmosfera havosi sifati maxsus komissiya tomonidan doimiy monitoring qilinmoqda”, — deyiladi xabarda.
Avvalroq O‘zgidromet ham 3−5-oktabr kunlari O‘zbekistonga sovuq va nam havo kirib kelishi, yomg‘ir yog‘ib, tog‘larda qorga aylanishi, shamol esa 22 m/s gacha kuchayishi haqida xabar bergandi.
Ayrim joylarda tuman tushishi kutilmoqda.