1 noyabrdan Toshkentda issiqlik va issiq suv narxlari oshishi mumkin

1 noyabrdan Toshkentda issiqlik va issiq suv qimmatlashishi mumkin

Qurilish va uy-joy kommunal xoʻjaligi vazirligi aholi uchun markazlashtirilgan issiqlik taʼminoti xizmatlariga yangi tariflarni joriy etishni nazarda tutuvchi loyihani jamoatchilik muhokamasiga qoʻydi.

Hujjatdan kelib chiqishicha, joriy yilning 1 noyabridan Toshkent aholisi uchun yangi narxlarni tasdiqlash taklif qilinmoqda. Markaziy isitish uchun toʻlov QQS bilan kuniga 1 kvadrat metr uchun 314 soʻmni, hisoblagich boʻyicha issiq suv QQS bilan 1 kub metr uchun 11 607 soʻmni, hisoblagich boʻlmaganda esa oyiga 1 kishi uchun 45 330 soʻmni tashkil etishi kerak. Issiqlik energiyasi tarifini Gkal uchun 206 636 soʻm darajasida, yotoqxonalarda yashovchilar uchun issiq suv taʼminotini esa kishi boshiga oyiga 33 720 soʻm etib belgilash taklif etilmoqda.

Hozirda 1 kub metr issiq suv QQS bilan 8928,7 soʻm, hisoblagichsiz kishi boshiga oyiga 34 868,9 soʻm turadi, isitish esa isitish mavsumining bir kuni uchun isitiladigan maydonning 1 kvadrat metriga 241,4 soʻm tarifi boʻyicha hisoblanadi. Agar loyiha qabul qilinsa, issiqlik energiyasi tarifi deyarli 48 foizga oshadi, poytaxt isteʼmolchilari uchun issiqlik va issiq suv narxi esa taxminan 30 foizga ortadi. Hujjatning jamoatchilik muhokamasi 28 oktyabrgacha davom etadi.