Toshkent hokimiyati 35 ta bozor xususiylashtirilishidan oldin ularning moliyaviy ahvoli va mol-mulkini tekshiradi
Toshkent hokimiyati 35 ta bozor xususiylashtirilishidan oldin ularning moliyaviy ahvoli va mol-mulkini tekshiruvdan oʻtkazadi
Toshkentda bozorlar va savdo majmualarining moliyaviy ahvoli, ularning mol-mulki va binolariga oid hujjatlarini tekshirish bilan shugʻullanadigan ishchi goʻruhi tuziladi. ushbu xatlov obʼyektlarni ochiq savdolarga chiqarishga tayyorlashning bir qismi boʻladi.
Tegishli qarorni poytaxt hokimi Shavkat Umurzoqov 20 oktyabr kuni imzoladi. Ishchi goʻruhi bozorlarning mol-mulkini tekshirishi, uning egalarini aniqlashi, noqonuniy qurilmalarni aniqlashi hamda soliqlar va boshqa majburiy toʻlovlar boʻyicha qarzdorliklarni oʻrganishi kerak.
Roʻyxatga, xususan, Oʻrikzor, Parkent bozori, Yangiobod bozori, "Aviasozlar" (Qodishev) bozori, Farhod va Sergeli bozorlari kiritilgan. Bu prezident Shavkat Mirziyoyevning 27 iyuldagi Toshkentni 2026–2027 yillarda ijtimoiy-iqtisodiy rivojlantirish boʻyicha qoʻshimcha chora-tadbirlar toʻgʻrisidagi qarorida nazarda tutilgan.
Yangi qarorga koʻra, Kadastr agentligining shahar boshqarmasi tuman hokimliklari bilan birgalikda bozorlar hududidagi bino va inshootlarning hujjatlarini tekshiradi, mol-mulk va uning egalari roʻyxatini tuzadi hamda maʼlumotlarni "Toshkent Invest" kompaniyasiga topshiradi.
Bundan tashqari, mutaxassislar savdo majmualari hududlarini koʻzdan kechiradi, noqonuniy qurilmalarni aniqlaydi, yer uchastkalari chegaralarini aniqlashtiradi hamda muhofaza hududlari va amaldagi cheklovlarni oʻrganadi. Zarurat tugʻilganda poytaxtning bosh rejasiga oʻzgartirishlar kiritish boʻyicha takliflar tayyorlanadi.
Toshkent shahar Soliq boshqarmasi bozorlarning soliqlar, majburiy toʻlovlar va boshqa toʻlovlar boʻyicha qarzdorliklarini tahlil qiladi. Hokimlik huzuridagi Munitsipal aktivlarni boshqarish markazi majmualarning moliyaviy ahvoli va mavjud muammolarini baholaydi.
Tekshiruv yakunlari boʻyicha hokimning birinchi oʻrinbosarlari bozorlar aktivlaridan keyinchalik foydalanish, shu jumladan ularni ommaviy savdolarga chiqarish toʻgʻrisidagi qaror loyihalarini tayyorlashlari va Vazirlar Mahkamasiga takliflar kiritishlari kerak.
Iyul oyidagi qarorda, shuningdek, savdoga chiqarilayotgan obʼyektlar uchun biznes-loyihalar ishlab chiqilishi, bozorlarni tayyor biznes formatida sotuvga tayyorlash bilan esa "Toshkent Invest" shugʻullanishi nazarda tutilgan. Bunda sotilgan obʼyektlar oʻrnida zamonaviy ekobozorlar, savdo-xizmat koʻrsatish va koʻngilochar majmualar, shuningdek, koʻp qavatli avtoturargohlar tashkil etish rejalashtirilmoqda.