Tilga eʼtibor bering
Tojikiston Prezidenti Emomali Rahmon tojik tilini internetda, fan va texnologiya sohasida, jumladan, sunʼiy intellekt bilan bogʻliq yoʻnalishlarda yanada faolroq rivojlantirishga chaqirdi. Bu haqda uning Tojikistonda 5 oktyabr kuni nishonlanadigan Davlat tili kuni munosabati bilan yoʻllagan murojaatida soʻz boradi.
Rahmonning soʻzlariga koʻra, fan, texnika, texnologiyalar va sunʼiy intellektning shiddatli rivojlanishi ixtisoslashtirilgan terminologiyaning doimiy yangilanib turishini talab etadi. Shu bilan birga, uning fikricha, yangi tushunchalarni imkon qadar tojik tilining oʻz leksik resurslari asosida shakllantirish lozim.
Prezident mutaxassislar muayyan sohalar mazmuniga mos keladigan tushunarli va aniq terminlarni taklif qilishlari zarurligini taʼkidladi. Uning hisoblashicha, bunday yondashuv tilning yangi texnologiyalar va ilmiy yoʻnalishlar paydo boʻlishiga moslashishiga yordam berishi kerak.
Rahmon raqamli muhitga alohida eʼtibor qaratdi. U internetda tojik adabiy tili meʼyorlaridan kengroq foydalanishga hamda mamlakatning milliy va madaniy xususiyatlarini hisobga olgan holda tojik tilidagi ilmiy va sohaviy materiallar sonini koʻpaytirishga chaqirdi.
Prezident yoshlarning til taʼlimini yana bir yoʻnalish sifatida tilga oldi. Uning soʻzlariga koʻra, taʼlimning ilk bosqichlaridanoq bolalar va oʻsmirlarga davlat tilining ijtimoiy ahamiyatini tushuntirish, savodli ogʻzaki va yozma nutqni rivojlantirish hamda unga nisbatan hurmat munosabatini shakllantirish zarur.
Rahmon, shuningdek, tojik adabiy tilini yaxshi bilish xorijiy tillarni oʻzlashtirishga yordam berishini va yosh avlodning milliy oʻzlikni anglashini shakllantirishda muhim rol oʻynashini taʼkidladi.
Davlat rahbari mustaqillik yillarida mamlakatda «Tojikiston Respublikasining davlat tili toʻgʻrisida»gi qonun va uni rivojlantirishning 2020–2030 yillarga moʻljallangan dasturi qabul qilinganini, Til va terminologiya qoʻmitasi tashkil etilganini, shuningdek, sohaviy va izohli lugʻatlar nashr etilayotganini eslatib oʻtdi.
Rahmonning baholashicha, 35 yillik mustaqillik davrida tojik tili ijtimoiy hayotdagi oʻz ahamiyatini sezilarli darajada kengaytirdi va milliy oʻzlikni anglash hamda mamlakat birligini mustahkamlash vositalaridan biriga aylandi.
Murojaat yakunida prezident til meʼyorlariga rioya qilishga, uning sofligini saqlashga va qoʻllanish doirasini — taʼlim va madaniyatdan tortib fan, texnologiyalar va global raqamli makongacha izchil kengaytirishga chaqirdi.