Tailand oʻzbekistonliklar uchun 15 kunlik vizasiz kirishni koʻrib chiqadi
Tailand 9 noyabrda Oʻzbekiston, Kolumbiya va Meksika fuqarolari uchun 15 kunlik vizasiz rejim joriy etishni muhokama qilishni rejalashtirmoqda.
Tailand Oʻzbekiston fuqarolari uchun 15 kunlik vizasiz kirish rejimini joriy etishi mumkin
Tailand Oʻzbekiston, Kolumbiya va Meksika fuqarolari uchun 15 kunlik vizasiz rejim oʻrnatish imkoniyatini oʻrganmoqda. The Nation Thailand xabariga koʻra, tegishli taklifni 9 noyabr kuni Viza siyosati qoʻmitasi yigʻilishida taqdim etish rejalashtirilmoqda.
Tailand Turizm va sport vaziri Surasak Pancharoyenvorakulning maʼlum qilishicha, qoʻmita ushbu tashabbusning mamlakat xavfsizligi va iqtisodiyoti uchun yuzaga kelishi mumkin boʻlgan oqibatlarini baholaydi. Idora xavfsizlik nuqtai nazaridan sayyohlari xavfi past deb hisoblangan davlatlar fuqarolari uchun vizasiz kirishni kengaytirish niyatida.
Tailand Turizm boshqarmasining Yevropa, Amerika, Yaqin Sharq va Afrikadagi xalqaro marketing boʻyicha rahbari oʻrinbosari Chiravadi Kxunsub bir qator yoʻnalishlarda mamlakatga kirish bilan bogʻliq jiddiy qiyinchiliklar hali ham saqlanib qolayotganini taʼkidladi.
Xususan, Oʻzbekiston fuqarolari ilgari elektron vizalarni rasmiylashtirishning murakkab tartibiga duch kelishgan, u xabar qilinishicha, Tailandning Rossiyadagi elchixonasi orqali amalga oshirilgan. Byurokratik gʻovlar mahalliy turistik agentliklarning Tailandga turpaketlarni sotishdan voz kechib, Vyetnamni oʻz ichiga olgan muqobil yoʻnalishlarga qayta yoʻnaltirilishiga olib keldi.
Avvalroq Tailand Oʻzbekiston fuqarolari uchun vizasiz rejimni bekor qilgan edi. 15 sentyabrdan boshlab oʻzbekistonliklar ushbu mamlakatga sayohat qilish uchun vizani oldindan rasmiylashtirishlari shart.
15 kunlik vizasiz kirishni joriy etish haqidagi tashabbus hozircha koʻrib chiqilmoqda. Yakuniy qaror Viza siyosati qoʻmitasining baholash yakunlariga bogʻliq boʻladi.
Yangi rejimning kuchga kirishi mumkin boʻlgan sanasi maʼlum qilinmagan.