«SQB» ilk bor Oʻzbekiston Superkubogini qoʻlga kiritdi
«SQB» penaltilar seriyasida «BMB»ni magʻlub etdi va oʻz tarixida ilk bor futzal boʻyicha Oʻzbekiston Superkubogini qoʻlga kiritdi.
«SQB» ilk bor Oʻzbekiston Superkubogini qoʻlga kiritdi
«SQB PFC» jamoasi oʻz tarixida ilk bor futzal boʻyicha Oʻzbekiston Superkubogi sohibiga aylandi. Ular penaltilar seriyasida mamlakatning amaldagi chempioni «BMB PFC» jamoasini magʻlub etdi. Uchrashuv Toshkentdagi «Humo Arena» sport majmuasida boʻlib oʻtdi va 2026/2027 yilgi mavsumga start berdi.
Oʻyinning asosiy vaqti 3:3 hisobidagi durang bilan yakunlandi, shundan soʻng sovrin taqdiri penaltilar seriyasida hal boʻldi. Unda «SQB» aniqroq harakat qildi — 4:2.
«BMB» oʻyinni faol boshladi va dastlabki daqiqalardayoq Shavkat Ibragimov darvozasi oldida bir nechta xavfli vaziyatlarni yuzaga keltirdi. «SQB» darvozaboni jamoasini bir necha bor qutqarib qoldi, baʼzi vaziyatlarda esa mezbonlarga hujumlarni yakunlashda aniqlik yetishmadi.
Biroq «SQB»ning ilk qarshi hujumi gol bilan yakunlandi. Ikkinchi daqiqada Samariddin Berkinov maydon markazida toʻpni egallab oldi, qanot boʻylab oldinga intildi va toʻpni Davlat Ibragimovga uzatdi. U aniq zarba bilan hisobni ochdi — 0:1.
Erta kiritilgan gol «SQB»ga qarshi hujumlarda ishonchliroq harakat qilish imkonini berdi. Soʻnggi toʻrt mavsum davomida «BMB» sharafini himoya qilib, uning muvaffaqiyatlariga hissa qoʻshgan Davlat Ibragimov va Xebbert Oliveyra Boltning transferlari ham jamoaning kuchayishiga xizmat qildi.
Ikkinchi boʻlimda jamoalar yuqori tempda oʻynashda davom etdilar. Timur Salimov va Boltning gollaridan soʻng «SQB» ustunlikni 3:1 koʻrinishiga keltirdi.
«BMB» muvozanatni tiklashga muvaffaq boʻldi. Jan Aldemiro ikkita gol urdi, Vitorning goli esa amaldagi chempionga hisobni tenglashtirish va oʻyinni penaltilar seriyasiga olib borish imkonini berdi.
Olti metrlik zarbalar seriyasida yana Shavkat Ibragimovning mahorati hal qiluvchi ahamiyatga ega boʻldi. «SQB» darvozaboni raqiblarning ikkita zarbasini qaytarib, jamoasining 4:2 hisobida gʻalaba qozonishiga va sovrinni qoʻlga kiritishiga yordam berdi.
Shu tariqa, «SQB PFC» 2026/2027 yilgi mavsumni Oʻzbekiston Superkubogidagi gʻalaba bilan boshladi va klub tarixida ilk bor ushbu sovringa ega chiqdi.