Sobiq sevgilisining sochini yulib olgan futbolchiga hukm oʻqildi

Sobiq sevgilisining sochini yulib olgan futbolchiga hukm oʻqildi

Sudda oʻzini oʻzi himoya qilgan Jordon Ayb juma kuni sudga "jiddiy xatoga yoʻl qoʻyganini" aytdi

Janjal paytida sobiq sevgilisining boshidan soch oʻrimini yulib olganidan keyin tan jarohati yetkazganini tan olgan futbolchi jarimaga tortildi va jamoat ishlariga jalb etildi.

"Bornmut" va "Liverpul" klublarining sobiq futbolchisi, 30 yoshli Jordon Ayb dekabr oyida London janubidagi Lambet tumanida joylashgan Emi Meysonning uyi tashqarisida unga hujum qilgan.

Angliya yoshlar terma jamoasining (U-21) sobiq aʼzosi, London janubi-sharqidagi Chizlhyorst shahridan boʻlgan futbolchi, avvalroq, mart oyida badanga shikast yetkazish ayblovini rad etgan boʻlsa-da, keyinchalik oʻz aybini tan oldi.

Kroydon magistratlar sudida Ayb Meysonning boshidan soch oʻrimini yulib olgani va buning oqibatida ayolning boshida sochsiz joy qolgani maʼlum qilindi. Sudda oʻzini oʻzi himoya qilgan futbolchi juma kuni sudga shunday dedi: "Men jiddiy xatoga yoʻl qoʻydim".

U qoʻshimcha qildi: "Bu notoʻgʻri ekanligini tushunaman. Chin dildan pushaymonman.

Men koʻzguda oʻzimga qarashga majbur boʻldim. Qilgan ishimni oʻzgartira olmayman, lekin bundan keyingi harakatlarim uchun javobgarlikni oʻz boʻynimga olaman".

Magistrat Brij Kalia Aybga 12 oylik jamoatchilik nazorati, 80 soatlik haq toʻlanmaydigan ish va 27 kunlik reabilitatsiya faoliyati jazosini tayinladi.

Shuningdek, u 764 funt sterling miqdorida jarimaga tortildi, bunga 114 funt sterling qoʻshimcha toʻlov va 650 funt sterling sud xarajatlari kiradi.

Ayb 2016-20 yillarda "Bornmut" safida 92 ta oʻyinda maydonga tushgan

Sudda maʼlum qilinishicha, 14 dekabr kuni er-xotin janjallashib qolishgan, oʻshanda Meyson Aybga roʻbaroʻ kelib, undan qarzini qaytarishni talab qilgan.

Prokurorlarning aytishicha, Aybning qoʻlida ichimliklar, yeguliklar va gullar solingan sumka boʻlgan, biroq Meyson maffinlarni yerga uloqtirib, uni "narkoman" deb ataganida, u ayolning sochidan ushlagan.

Prokuror Aya Alshexilining taʼkidlashicha, ushbu hujum Meysonning oʻziga boʻlgan ishonchi va qadr-qimmatini "yer bilan bitta qilgan".

Uning soʻzlariga koʻra, hujumga qadar bu juftlik 2024 yil oxiridan beri "goh ajralib, goh yarashib" yurishgan.

Sudda oʻqib eshittirilgan jabrlanuvchining bayonotida Meyson bu voqea unga "ham jismoniy, ham ruhiy jihatdan sezilarli taʼsir koʻrsatganini" aytdi.

U hali ham "qoʻrquv hissi" borligiga qaramay, Aybga nisbatan "rahm-shafqat" his qilayotganini va kechirimlilik uning "sogʻayish yoʻli"ning bir qismi boʻlganini qoʻshimcha qildi.

Futbolchi 2012 yilda "Liverpul"ga kelib qoʻshilgan va barcha musobaqalarda 58 ta oʻyinda maydonga tushgan, shundan soʻng "Derbi Kaunti", "Birmingem Siti" klublarida oʻynagan va 2016 yildan 2020 yilgacha "Bornmut" safida 92 ta oʻyinda ishtirok etgan.

Qanot yarim himoyachisi ikki yil davomida havaskorlar ligasida oʻynadi va 2025 yil noyabr oyida Bolgariya Birinchi ligasidagi hozirgi jamoasi — Sofiyaning "Lokomotiv" klubiga oʻtdi.

Metropoliten politsiyasi avvalroq u 30 yanvar kuni Luton aeroportida hibsga olinganini maʼlum qilgan edi.