Six Flags yuzlab odamlar bosh miya shikastlanishidan shikoyat qilganidan keyin X2 attraktsionini yopdi
Bu bayonot oʻrindiqlari 360 darajaga aylanadigan X2 attraktsioni tufayli yuzlab chavandozlar bosh miya jarohati olgani daʼvo qilingan bir nechta sud daʼvolaridan keyin yangradi.
Six Flags yuzlab odamlar bosh miya shikastlanishi olganliklarini daʼvo qilganidan keyin X2 amerikancha tepaliklari attraktsionini yopmoqda
Kaliforniyadagi Six Flags Magic Mountain koʻngilochar bogʻi yuzlab tashrif buyuruvchilar bosh miya shikastlanishi olganliklarini daʼvo qilganidan keyin mashhur amerikancha tepaliklar attraktsionini butunlay yopishini maʼlum qildi.
Uzun navbatlari va 360 darajaga aylanadigan oʻrindiqlari bilan tanilgan, bogʻning eng ommabop attraktsionlaridan biri boʻlgan X2 amerikancha tepaliklari iyul oyidan beri ishlamayotgan edi.
Six Flags kompaniyasining bildirishicha, attraktsion bir qator xavfsizlik sinovlaridan muvaffaqiyatli oʻtgan, biroq ular uni foydalanishdan chiqarishni maʼqul koʻrishgan, chunki bu «toʻgʻri qaror» edi.
Ushbu qadam yuzlab odamlar X2 attraktsionida uchganidan keyin bosh miya shikastlanishi olgani daʼvo qilingan daʼvo arizalari va OAV xabarlari ortidan qoʻyildi. Daʼvogarlarning ayrimlari manfaatlarini himoya qilayotgan yuridik firma ushbu qaror oʻz mijozlari uchun «juda kech» qabul qilinganini aytdi.
Six Flags Magic Mountain bogʻi prezidenti Brayan Erding shunday dedi: «Attraktsionlar xavfsizligi biznesimizning asosidir va mehmonlar ishonchiga putur yetganini koʻrganimizda, biz bunga jiddiy yondashamiz».
Bogʻga qarshi fuqarolik daʼvolari qoʻzgʻatgan Dordick Law Corporation yuridik firmasi attraktsion tufayli shikastlanganiga ishonadigan yuzlab odamlardan murojaatlar olganini maʼlum qildi.
«Ular hayajonli lahzalarni kutib X2 attraktsioniga chiqishgan edi. Buning oʻrniga ular ogʻir bosh miya shikastlanishlari bilan qaytishdi», deyiladi firma bayonotida. «Ayrimlariga shoshilinch bosh miya jarrohlik amaliyoti kerak boʻldi. Baʼzilari hali ham normal hayotga qaytish uchun kurashmoqda».
Yuridik firmaning taʼkidlashicha, garchi ular kelajakdagi mehmonlarni himoya qilish uchun attraktsionning yopilishini olqishlasalar-da, «bu allaqachon jabrlangan odamlar uchun hech narsani oʻzgartirmaydi».
Dastlab X deb nomlangan attraktsion 2002 yilda ochilgan, biroq bir necha oydan keyin konstruktiv kamchiliklarni tuzatish uchun yopilgan edi, deb xabar beradi Los Angeles Times. 2007 yilda u poyezdlarini yengilroq versiyalarga almashtirish uchun yana yopilgan.
Keyingi yili u X2 nomi bilan qayta ochildi va oʻshandan beri unda 16 milliondan ortiq odam uchdi, deb xabar berdi bogʻ maʼmuriyati.
2022 yilda X2 attraktsionida uchganidan keyin vafot etgan 22 yoshli Kristofer Xoulining oilasi manfaatlarini himoya qilgan yuridik firma attraktsionning yopilishi yetarli emasligini aytdi.
Xouli oilasi «Six Flags nihoyat X2 ni yopayotganini eshitib yengil tortgan boʻlsa-da, bu Kristofer Xoulining deyarli yigirma yil davomida ishlashiga ruxsat berilgan xavfli amerikancha tepaliklar tufayli halok boʻlgani faktini oʻzgartirmaydi», dedi advokat Brent Uisner Wisner Baum LLP bayonotida BBC'ga.
Xoulining oilasi avgust oyida koʻngilochar bogʻ bilan ehtiyotsizlik orqasida oʻlimga sabab boʻlish boʻyicha daʼvo yuzasidan kelishuvga erishgan.
«Bu fojiani ortga qaytarib boʻlmaydi», dedi Uisner qonunchilik islohoti, faol tartibga solish va tegishli davlat nazoratiga chaqirib.
«Biz faqat yetarlicha odam jabrlanganidan keyingina toʻgʻri ish qiladigan, foydaga yoʻnaltirilgan korporatsiyalarga suyana olmaymiz», deya qoʻshimcha qildi u. «Umid qilamizki, X2 oʻrnini egallaydigan har qanday narsa xavfsiz boʻladi».