Shirin va pishgan mandarinlarni tanlashning 7 ta usuli
Eng mazali va xushbo‘y mevalarni xarid qilish uchun mandarin tanlashning barcha nozik jihatlarini o‘rganib oling.
**Shirin va pishgan mandarinlarni tanlashning 7 ta usuli**
Ilgari ko‘pchiligimiz mandarinni faqat Yangi yil dasturxonining noz-ne’mati deb bilardik va qishki bayramlarni sabrsizlik bilan kutardik. Endi esa bu yorqin to‘q sariq sharlar deyarli oktyabr oyidanoq savdoga chiqadi. Navlari shunchalik ko‘pki, ko‘z qamashadi: rastalarda katta-kichik, bargli-bargsiz, yaltiroq-xira, xoldor hamda po‘stlog‘i silliq sitruslar yonma-yon terib qo‘yilgan. Shu bois uyga eng mazali va xushbo‘y mevalarni olib ketish uchun mandarin tanlashning barcha nozik jihatlarini bilib olishga to‘g‘ri keladi.
**Faqat ayrim navlardagina danak bo‘lmaydi**
Do‘kon tokchalari va bozor rastalarida turli xil mandarinlar, jumladan, ularning duragay navlari ham uchraydi. Agar danaksiz sitrus meva olmoqchi bo‘lsangiz, sotuvchidan uning navi qaysi ekanini so‘rang yoki narxnoma yoxud qadoqdagi yozuvni o‘zingiz tekshiring. Agar u yerda “Klementin” yoki “Unshiu” deb yozilgan bo‘lsa, mandarin ichida katta ehtimol bilan danak bo‘lmaydi. “Murkott” va “Ponkan” nomlari esa buning aksini bildiradi.
**Mandarinning o‘lchami va shakli ham muhim**
Yaxshisi, o‘rtacha kattalikdagi yoki kichikroq mandarinlarni tanlang — ularning shirin chiqish ehtimoli yuqoriroq. Ularda danak ham juda kam bo‘ladi. Bundan tashqari, mitti mandarinlarda ko‘pincha yashil shoxchalar bo‘lib, ular juda chiroyli ko‘rinadi. Kattaroq sitruslar ham foydali: ulardan uyda murabbo tayyorlash mumkin.
**Meva bandiga e’tibor bering**
Mandarinlarni savatga solishdan oldin bandi joyiga qarash ma’qul. Bu qism haddan tashqari quruq ham, yashil ham bo‘lmasligi kerak. Birinchi holatda mandarinlar katta ehtimol bilan juda uzoq saqlangan bo‘ladi, ikkinchisida esa ular hali to‘liq pishib yetilmasidan uzib olingan bo‘ladi.
**Sitrus mevalarning shakli ko‘p narsani anglatadi**
Xarid qilishdan oldin mandarinning shakliga ham e’tibor bering. Agar uning tepa qismi biroz yassiroq bo‘lsa, katta ehtimol bilan u pishgan va sersuv bo‘ladi. Mazali mandarinning yana bir muhim belgisi — uning hidi. Mevaning hidi qanchalik xushbo‘y va o‘tkir bo‘lsa, shuncha yaxshi. Hidsiz mandarinlar esa, katta ehtimol bilan, hali pishmagan yoki allaqachon aynib qolgan bo‘ladi.
**Mevaning rangidan ta’mini bilish mumkin**
Yorqin to‘q sariq va yaltiroq mandarinlarni tanlagan ma’qul. Po‘stining qizg‘ish tusda bo‘lgani yaxshi. Xira rang esa ko‘pincha mandarinlar omborda uzoq turib qolganidan darak beradi. Aksariyat navlarda po‘stlog‘ining yashilroq yoki och tusda bo‘lishi hamda sirtidagi dog‘lar sitrus mevalar hali pishib yetilmaganini anglatishi mumkin.
**Mandarin pishganini biroz bosib tekshirish mumkin**
Mandarinni asta bosib ko‘ring. Pishgan meva tarang bo‘ladi va bosilganda birozgina eziladi. Qattiqlari, katta ehtimol bilan, hali xom bo‘ladi, juda yumshoqlari esa allaqachon ayniy boshlagan bo‘lib chiqadi. Po‘sti burishgan yoki dag‘alroq mandarinlarni olmagan ma’qul.
**Ba’zida mandarinlarni klementin, mandor va mineolalar bilan adashtirib yuborish mumkin**
Ushbu suratda mandarin emas, mandora tasvirlangan. Kiprda yetishtiriladigan maxsus mandarin va apelsin duragayi shunday ataladi. Bu sitrusning po‘stlog‘i biroz qattiq bo‘lsa-da, ichi sersuv etga to‘la. Shuningdek, do‘konlarda mandarin va apelsinning yana bir duragayi — klementinlar ham tez-tez uchraydi. Ularni yorqin to‘q sariq po‘stlog‘i, dumaloq va silliq yonlaridan osongina ajratish mumkin. Mandarin va greypfrutning “bolasi” hisoblangan mineolalar ham yorqin to‘q sariq rangda bo‘lib, po‘sti silliq, ammo ta’mi nordon-shirin va ichida danaklari bor.