Shahrisabzda ilk bor Silk Road Uzbekistan yugurish musobaqasi boʻlib oʻtdi

27 sentyabr kuni Shahrisabzda ilk bor Silk Road Uzbekistan xalqaro seriyasining yugurish musobaqasi boʻlib oʻtdi. Oqsaroy saroyining muhtasham devorlari yonidagi start chizigʻiga yugurish havaskorlari, talabalar, yugurish klublari aʼzolari, blogerlar va professional sportchilar chiqishdi. Musobaqa ishtirokchilarga Amir Temur vatanini yangi tomondan koʻrish imkoniyatini berdi.

Silk Road Shakhrisabz tadbiri tashkilotchilari sifatida Markaziy Osiyo yugurish va yurish akademiyasi, Oʻzbekiston Respublikasi Oliy taʼlim, fan va innovatsiyalar vazirligi, Oʻzbekiston Respublikasi Prezidenti huzuridagi Milliy ijtimoiy himoya agentligi Qashqadaryo viloyati Sport boshqarmasi koʻmagida ishtirok etdi.

«Oʻzbektelekom» AJ va Oʻzbekiston Respublikasi Tashqi iqtisodiy faoliyat milliy banki Silk Road Uzbekistan’ning doimiy hamkorlari boʻlib, ular seriyaning bahorgi va kuzgi musobaqalarini qoʻllab-quvvatlab kelmoqda. Ushbu koʻmak tufayli startlar mamlakatning turli hududlarida oʻtkazilmoqda va tobora koʻproq odamlarga yugurish bilan shugʻullanish imkoniyatini bermoqda.

Seriyaning bundan oldingi kuzgi starti 13 sentyabr kuni Xivada boʻlib oʻtgan edi. Arda Khiva turistik majmuasi hududida oʻtkazilgan Silk Road Khiva musobaqasida minglab yuguruvchilar, jumladan, boshqa mamlakatlardan kelgan mehmonlar ishtirok etdi.

«Bu yil Silk Road Uzbekistan seriyasi Buyuk ipak yoʻli shaharlaridagi sakkizta sport tadbirini birlashtirdi. Yettita start allaqachon boʻlib oʻtdi va bugun Shahrisabz navbatdagi estafetani qabul qildi. Oldinda 11 oktyabr kuni Silk Road Andijan yarim marafoni kutmoqda. Oqsaroy yonida keng koʻlamli yugurish musobaqasini oʻtkazish — murakkab tashkiliy vazifa, shu bois Akademiya trassani tayyorlash va ishtirokchilar uchun sharoitlar yaratishga alohida eʼtibor qaratdi. Yuguruvchilar nafaqat oʻz natijalarini, balki Shahrisabz tarixi bilan uchrashuvni ham eslab qolishlariga umid qilamiz», — deb taʼkidladi Markaziy Osiyo yugurish va yurish akademiyasi direktori Shuhrat Usmonov.

Silk Road Shakhrisabz dasturidan 5 va 10 km masofaga yugurish, 5 km masofaga skandinavcha yurish va 250 m hamda 500 m masofaga Kids Run bolalar yugurish musobaqalari oʻrin oldi. Shuningdek, tadbir doirasida 3000 ga yaqin talaba ishtirok etgan 3 km masofaga Talaba Yugur talabalar musobaqasi va ramziy 1 km masofaga Inson Uchun xayriya inklyuziv yugurish musobaqasi boʻlib oʻtdi.

Musobaqaning sovrin jamgʻarmasi 69 mln soʻmni tashkil etdi. Erkaklar va ayollar oʻrtasida 5 va 10 km masofalarda 24 ta sovrinli oʻrin uchun pul mukofotlari koʻzda tutilgan. Bolalar musobaqalari va skandinavcha yurish gʻolib hamda sovrindorlari tashkilotchilar va hamkorlarning sovgʻalarini qoʻlga kiritishdi.

Silk Road Uzbekistan seriyasining har bir ishtirokchisi uchun start paketi koʻzda tutilgan boʻlib, unga chipli start raqami, ryukzak, kepka, medal va Ispaniyaning Joma brendiga tegishli brendlangan sport maykasi kiradi.

11 oktyabr kuni ikkinchi Silk Road Andijan yarim marafoni boʻlib oʻtadi.

1. Baxtiyor Oʻtkirov — 0:14:23

2. Ruslan Xodjiyev — 0:14:34

3. Nodirbek Mutalipov — 0:14:45

1. Shahsonam Xurramova — 0:16:56

2. Nasima Mamurova — 0:17:40

3. Zizolabonu Yuldasheva — 0:17:50

1. Eldor Botirov — 0:30:17

2. Jobir Qahhorov — 0:30:19

3. Nuriddin Rahmatov — 0:30:45

1. Saidabonu Nusratilloyeva — 0:35:44

2. Arofat Imomaliyeva — 0:36:17

3. Darya Antropova — 0:37:14