Ruanda prezidentining surgundagi tanqidchisi boshi uzilgan holda topildi
Sobiq armiya serjant-mayori Robert Kabera mashhur yutuber va xonanda boʻlib, Ugandadan boshpana soʻragan edi.
**Ruanda prezidentining surgundagi tanqidchisi boshi kesilgan holda topildi**
Robert Kabera taniqli yutuber va xonanda edi
Ruanda armiyasining sobiq serjant-mayori, keyinchalik prezident Pol Kagamening ashaddiy tanqidchisiga aylangan shaxs qoʻshni Ugandada boshi kesilgan holda topildi.
50 yoshli Robert Kabera jinsiy tejovuzlikda ayblangach, Ruandani tark etgan edi, u bu ayblovni rad etgan. U siyosiy taʼqibga uchrayotganini aytib, qoʻshni Ugandadan boshpana soʻragan.
Uganda politsiyasi matbuot kotibi Kituuma Rusoke dushanba kuni Kaberaning boshi hali ham topmaganini aytdi. Uning jasadi dam olish kunlari Kampala chekkasida mahalliy aholi tomonidan topilgan.
Ruanda hukumati ushbu qotillik boʻyicha oshkora izoh bermadi. Kagamening bir qancha tanqidchilari ham Ruanda ichida, ham xorijda oʻldirilgan.
Uning bevasi Janna d'Ark Rvigema Uvizeye BBC Great Lakes xizmatiga yozgan xabarida endilikda oilasi xavfsizligidan xavotirda ekanini aytdi.
"Bu juda vahimali. Oʻzimni aqldan ozganday his qilyapman, bolalarim va mening xavfsizligimiz taʼminlanmagan", dedi u.
Oilasining soʻzlariga koʻra, Kabera oʻlimidan oldin Kampaladan taxminan 45 km (30 mil) uzoqlikdagi qurilish maydonini koʻzdan kechirish uchun ketgan edi.
Kabera musiqachi va yutuber sifatida tanilgan boʻlib, uning kanalida 144 000 dan ortiq obunachi bor edi. Kanaldagi 800 dan ortiq videolarning koʻpchiligi Kagame va uning hukumatini tanqid qilishga bagʻishlangan.
Uning oʻlimi surgunda yashayotgan ruandalik dissidentlarning xavfsizligi borasidagi xavotirlarni yanada kuchaytirdi.
2014 yilda muxolifat partiyasini tuzishga yordam bergan Ruanda razvedkasining sobiq rahbari Patrik Karegeya Janubiy Afrikaning Yoxannesburg shahridagi mehmonxona xonasida oʻlik holda topilgan edi.
2019 yilda Janubiy Afrika uni oʻldirishda ayblangan ikki ruandalikni hibsga olishga order bergan.