Sobiq prezident Kongo Demokratik Respublikasining yangi isyonchilar koalitsiyasi yetakchisi etib tayinlandi

Sobiq prezident Kongo DR yangi isyonchilar koalitsiyasining yetakchisi etib tayinlandi

Jozef Kabila 2001 yildan 2019 yilning yanvar oyigacha Kongo DR prezidenti boʻlgan

Kongo sobiq prezidenti Jozef Kabila hukumatni hokimiyatdan chetlatishni xohlayotganini aytayotgan yangi isyonchilar koalitsiyasining rahbari etib tayinlandi.

Millatni qayta tiklash fronti (FRN) Kongo Demokratik Respublikasidagi «tiranlik»ka chek qoʻyish uchun «karshilik kuchlari»ni birlashtirish niyatida ekanini bildirdi va bu maqsadga «barcha vositalar, jumladan, kuch ishlatish orqali» erishishini aytdi.

Dushanba kuni uning tashkil etilgani eʼlon qilinishi Kabilaning davlatga xoinlikda ayblanib, sirtdan oʻlim jazosiga hukm qilinganidan bir yil oʻtib, qurolli harakatda bevosita ishtirok etayotganining eng kuchli belgisidir. Bundan oldin u M23 isyonchi guruhi bilan har qanday aloqadorlikni rad etgan edi.

Kongo hukumati bunga izoh bermadi.

Koalitsiya Kongo DR sharqidagi eng yirik shahar boʻlgan va oʻtgan yildan beri M23 nazoratida boʻlib kelayotgan Goma shahridagi Kabilaning xonadonida oʻtkazilgan matbuot anjumanida tanishtirildi.

M23 yetakchisi Sultani Makenga yangi harakatda Kabilaning toʻrt oʻrinbosaridan biri boʻladi. Qolgan uch nafari ham oʻtgan yili Kongo DRning foydali qazilmalarga boy sharqiy qismining katta hududini egallab olgan AFC-M23 alyansiga mansubdir.

Yangi guruh haqidagi eʼlon Kabila Kongo xalqi oʻz mamlakatini «qutqarish» uchun qanday harakat qilishi kerakligini tushuntirishini aytgan nutqidan bir necha kun oʻtib yangradi.

Juma kuni Kabila prezident Feliks Chisekedi hukumatini oʻtgan yili u tomonidan ilgari surilgan, jumladan, Kongo DR sharqidagi nizoni hal qilishga qaratilgan takliflarni eʼtiborsiz qoldirganlikda aybladi.

Kabila, shuningdek, hukumatni konstitutsiyaviy tartibni zaiflashtirganlikda, iqtisodiyotni yomon boshqarganlikda va xavfsizlikni taʼminlay olmaganlikda aybladi. U siyosiy muxoliflar va harbiy ofitserlarning oʻzboshimchalik bilan hibsga olinayotganini ham daʼvo qildi.

Hukumat ushbu ayblovlarga oshkora javob bermadi.

55 yoshli Kabila Kongo DRni 2001 yildan 2019 yilning yanvar oyigacha, bahsli saylovlardan soʻng Chisekedi hokimiyatga kelguniga qadar boshqargan.

Sobiq prezident bir necha yil davomida jamoatchilik eʼtiboridan chetda yurgan edi, ammo oxirgi paytlarda oʻz izdoshining maʼmuriyatini ochiqdan-ochiq keskin tanqid qila boshladi.

Yangi koalitsiyaning tuzilishi oʻnlab yillar davomida zoʻravonliklardan aziyat chekib kelayotgan mamlakatdagi nozik bir paytga toʻgʻri kelmoqda.

Etnik adovat hamda siyosiy taʼsir va qimmatli tabiiy resurslar nazorati uchun kurashlar fonida Kongo DR sharqida 100 dan ortiq qurolli guruhlar faoliyat yuritmoqda.

Chisekedining ikkinchi muddati 2028 yilda tugaydi, ammo may oyida u mojaro sababli oʻshanda oʻtkazilishi kerak boʻlgan saylovlar boʻlib oʻtmasligi mumkinligini aytgan edi.

U, shuningdek, «agar xalq xohlasa», uchinchi muddatga oʻz nomzodini qoʻyishi mumkinligiga shama qildi.

Parlament shundan beri konstitutsiyadagi ikki muddatli cheklovni bekor qilish boʻyicha referendumga yoʻl ochishi mumkin boʻlgan qonun loyihasini maʼqulladi.

Oʻtgan oyda rasmiylar poytaxtda taklif qilinayotgan oʻzgarishlarga qarshi namoyishga chiqqan eʼtirozchilar bilan toʻqnashdi.