Kosovoning sobiq prezidenti urush jinoyatlari uchun 25 yilga ozodlikdan mahrum etildi

Kosovoning sobiq prezidenti urush jinoyatlari uchun 25 yilga ozodlikdan mahrum etildi

Kosovoning sobiq prezidenti Xashim Tachi urush jinoyatlarida aybdor deb topilib, 25 yillik qamoq jazosiga hukm qilindi.

Chorshanba kuni Gaagada boʻlib oʻtgan sud majlisida 58 yoshli sobiq prezident Kosovoning 1990-yillarda Serbiyaga qarshi mustaqillik urushi paytida sodir etilgan jinoyatlar uchun hukm qilindi. Ushbu mojaroda 10 000 dan ortiq kishi halok boʻlgan edi.

Uch yil davom etgan sud jarayonidan soʻng, u qotillik, noqonuniy hibsga olishlar, qiynoqlar va shafqatsiz muomala kabi jinoyatlarda aybdor deb topildi. Unga qoʻyilgan boshqa bir qancha ayblovlar oʻz isbotini topmadi.

Tachi mustaqillik uchun kurashgan Kosovo ozodlik armiyasi (KOA) hammuassisi va qoʻmondoni boʻlgan. U Kosovoda qahramon sifatida koʻriladi.

U 100 ga yaqin odamni oʻldirishda va boshqa vahshiyliklarni, jumladan, odamlarni majburiy gʻoyib qilishni amalga oshirishda ayblangan edi.

Tachi shunga oʻxshash ayblovlarga duch kelgan KOAning yana uch nafar sobiq qoʻmondoni bilan birga sud qilindi.

Kosovo ozodlik armiyasi (KOA) 1990-yillarning boshlarida oʻsha paytdagi Serbiya provintsiyasida etnik albanlarning jangari guruhi sifatida tashkil etilgan boʻlib, urush paytida mintaqadagi etnik serb ozchiligiga qarshi hujumlar uyushtirganlikda ayblanadi.

Tachi 2008 yilda mamlakat mustaqilligini eʼlon qilganida Kosovoning birinchi bosh vaziri boʻldi. Keyinchalik u prezident sifatida faoliyat yuritdi, ammo 2020 yilda Gaagadagi ayblovlarga javob berish uchun isteʼfoga chiqdi.

Kosovoda minglab odamlar hukm eʼlon qilinishini katta ekranlarda tomosha qilish uchun yigʻildilar.

Poytaxt Prishtinada olingan fotosuratlar va videolarda odamlar hukmni eshitib, koʻz yoshi toʻkayotgani aks etgan.