Rossiyaning yirik porti dronlar hujumiga uchradi
Rossiyaning Novorossiysk shahriga uchuvchisiz uchish apparatlari bilan hujum qilindi. OSINT-tahlillarga koʻra, zarbalardan keyin mazut terminali hamda koʻp qavatli turar joy binosida yongʻin chiqqan. Dastlabki maʼlumotlarga koʻra, jabrlanganlar yoʻq.
Rossiyaning yirik portiga dronlar hujumi uyushtirildi
9-sentabrga oʻtar kechasi Novorossiysk uchuvchisiz uchish apparatlari (BPLA) bilan nishonga olindi.
Bu haqda shahar meri Andrey Kravchenko Telegram orqali xabar berdi.
Uning aytishicha, urib tushirilgan dronlar bo‘laklari korxonalar hududiga ham, turar joy binosi yaqiniga ham tushgan. Dastlabki maʼlumotlarga koʻra, jabrlanganlar yoʻq. Hodisa joylarida tezkor xizmatlar hujum oqibatlarini bartaraf etish bilan shugʻullanmoqda.
ASTRA nashrining ochiq manbalar asosidagi OSINT-tahliliga koʻra, zarbalardan keyin Novorossiyskdagi mazut terminalida kuchli yongʻin chiqqan. Ushbu terminal Rossiyadagi eng yirik port tarkibiga kiruvchi Novorossiysk transport uzelining muhim korxonalaridan biri sanaladi.
Shuningdek, shaharning boshqa qismida ham yongʻin qayd etilgan. Guvohlardan biri uni videoga olgan. ASTRA maʼlumotiga koʻra, Volgogradskaya koʻchasidagi koʻp qavatli turar joy binosida ham yongʻin yuz bergan.
Novorossiysk Rossiya tashqi savdosi uchun strategik ahamiyatga ega port shaharlardan biri boʻlib, uning porti Yevropadagi eng yirik portlar qatoriga kiradi. U orqali Rossiyaning jahon bozorlariga chiqariladigan neft, metall, konteyner yuklari va katta hajmdagi don mahsulotlari tashiladi.
Maʼlumotlarga koʻra, Rossiya don eksportining uchdan bir qismigacha Novorossiysk porti orqali amalga oshiriladi. Bunga portning mamlakatning asosiy qishloq xoʻjaligi hududlariga yaqin joylashgani ham sabab boʻladi.
Avgust oyida ham Novorossiyskka zarbalar kuchaygani ortidan neft va don mahsulotlarini yuklash hamda joʻnatish jarayonlarida sezilarli uzilishlar kuzatilgan edi.