Rossiya Ukraina bo‘yicha yangi takliflarni ko‘rib chiqishga tayyorligini ma’lum qildi
Rossiya Ukraina bo‘yicha yangi takliflarni ko‘rib chiqishga tayyorligini bildirdi.
Rossiya tashqi ishlar vaziri o‘rinbosari Sergey Ryabkov "News.ru"ga bergan intervyusida mamlakat Ukraina urushini yakunlash bo‘yicha yangi takliflarni eshitishga tayyorligini ma’lum qildi.
Uning so‘zlariga ko‘ra, "Rossiya Federatsiyasi prezident belgilagan maqsadlarga mos keladigan va joylardagi real vaziyatni hisobga oladigan har qanday oqilona taklif va g‘oyalarni tinglashga tayyor".
Ryabkovning ta’kidlashicha, AQSH avvalgi muzokaralarda Rossiya pozitsiyasini "ma’lum darajada tushunishini" ko‘rsatgan. Endi esa, uning fikricha, Vashington Kiyev va Yevropa davlatlarining qarorlariga qanchalik ta’sir o‘tkaza olishi muhim.
Rossiya prezidenti Vladimir Putin avvalroq o‘t ochishni to‘xtatish uchun Ukraina Donbass hududidan qo‘shinlarini olib chiqishi, NATOga a’zo bo‘lishdan voz kechishi va harbiy salohiyatini qisqartirishi kerakligini bildirgan edi. Biroq Ukraina bu talablarning bir qismini, jumladan, Donbassni topshirish, armiyani qisqartirish va NATOga qo‘shilishdan voz kechish shartlarini qabul qilmagan edi.
AQSH vositachiligida yil boshida o‘tkazilgan bir necha raund muzokaralarda kelishuvga erishilmadi. Mart oyiga rejalashtirilgan navbatdagi uchrashuvlar esa AQSH va Isroilning Eronga qarshi urushi boshlangach bekor qilingan edi.
Muzokaralarda AQSH maxsus vakillari Stiv Uitkoff va Jared Kushner vositachilik qilgan. Kreml 20-avgust kuni ularning Rossiyaga navbatdagi tashrifi haqida hozircha yangi ma’lumot yo‘qligini bildirdi.
Ukraina prezidenti Vladimir Zelenskiy ham AQSH vositachilarining muzokaralarga qaytishini kutayotganini aytib, ayrim yo‘nalishlarda "yangi yondashuvlar kerak"ligini ta’kidlagan. Ukraina 11-avgust kuni AQSH tomoniga urushni tugatish bo‘yicha o‘z takliflarini taqdim etgan.
Frontda janglar davom etmoqda. Rossiya hozir Ukraina hududining qariyb 20 foizini nazorat qilmoqda.
19-avgust kuni Rossiyaning Kiyev va boshqa hududlarga bergan zarbalari oqibatida kamida 17 kishi halok bo‘ldi, 40 dan ortiq odam yaralandi. Ukraina esa Rossiyaning Perm viloyatidagi neftni qayta ishlash zavodi va Volgograd viloyatidagi harbiy aerodromga dronlar bilan zarba berganini ma’lum qildi.