Rossiya Hyustondagi G20 energetika sammitiga chaqirildi
Rossiya vakili global energetika bozoridagi keskin vaziyat fonida Hyustonda oʻtadigan G20 vazirlar yigʻilishida qatnashadi. Uchrashuv Yevropa gaz zaxiralari pastligi, Hoʻrmuz boʻgʻozidagi uzilishlar va yoqilgʻi narxlari oshishi sharoitida oʻtmoqda.
Rossiya Hyustondagi G20 energetika sammitiga taklif qilindi
Kelasi hafta Hyustonda oʻtadigan G20 energetika vazirlari yigʻilishida Rossiya rasmiy vakili qatnashadi. Bu haqda juma kuni Oq uy vakili maʼlum qildi, deb yozdi.
«G20 Ministerial Meeting on Energy Abundance» nomli tadbir dushanbadan chorshanbagacha davom etadi. Unda AQSH tomonidan ichki ishlar vaziri Dug Burgum, energetika vaziri Kris Rayt va Oq uy vakili Jarrod Eygen ishtirok etishi kutilmoqda. Vashington rossiyalik ishtirokchining ismini darhol oshkor etmadi. Yigʻilishga Yevropa va Osiyodan ham energetika sohasi rasmiylari taklif etilgan.
Bu qisqa vaqt ichida Rossiyaning «Katta yigirmatalik» formatlariga qisman qaytayotganidan darak beruvchi ikkinchi ishoradir. Avgust oyida AQSH moliya vaziri Anton Siluanovga 2022-yilda Ukrainada urush boshlanganidan buyon ilk bor Shimoliy Karolinadagi G20 yigʻilishida shaxsan qatnashishga ruxsat bergandi.
Rasmiy mavzu — «energetik moʻl-koʻllik». Ammo asl kun tartibi ancha keskin. Yevropalik auditorlar yaqinda YEI Rossiya nefti va gazidan voz kechish jarayoni rejalashtirilganidan sekinroq ketayotganini hamda qish oldidan gaz zaxiralari pastligicha qolayotganini tan oldi. Shu bilan birga, Ukrainadagi urush va Eron atrofidagi vaziyat bozorlarni talvasa bosmoqda: AQSHda dizel yoqilgʻisi galloni 6 dollardan oshib, rekord oʻrnatdi, Hoʻrmuz boʻgʻozi neft va gaz yetkazib berish uchun amalda yopilgan, AQSHning oʻzida esa maʼlumotlar markazlari qurilishi energetika tizimiga bosim oʻtkazyapti.
Reutersga koʻra, siyosiy muhit ham tarang. Donald Tramp yaqinda Vladimir Putin bilan «aʼlo darajadagi» suhbat oʻtkazgani va Moskvaning Ukraina boʻyicha kelishuv tuzish istagi borligi haqida gapirgandi. AQSH, Ukraina va Yevropa davlatlari razvedkasi bu niyatlarning jiddiyligiga shubha bilan qaramoqda. Ayni paytda, AQSH Vakillar palatasi, katta ehtimol bilan, Hyuston yigʻilishi kunlarida Rossiyaga qarshi yangi sanksiyalar boʻyicha ovoz beradi. Qonun loyihasining qabul qilinishi kafolatlanmagan.
Tramp maʼmuriyatining Ukrainadagi urush boʻyicha Rossiyaga qarshi birinchi sanksiyalari 2025-yil oktabr oyida joriy etilgan boʻlib, «Rosneft» va «Lukoyl»ga taʼsir qilgan edi.
Rossiya vakilining G20 energetika yoʻnalishidagi yigʻilishda ishtirok etishi Vashingtonning sanksiyalar bosimini olib tashlamagan holda neft va gaz bozorlari boʻyicha muloqot kanalini saqlab qolishga urinishi sifatida koʻrilmoqda.