Qozogʻiston Toshkent yoʻnalishida «ayollar vagonlari»ni yoʻlga qoʻymoqda
Qozogʻiston 2026 yil 1 oktyabrdan boshlab ilk bor Olmaota – Toshkent yoʻnalishidagi №1/2-sonli xalqaro poyezdda «ayollar vagoni»ni joriy etadi. Maxsus vagonga faqat ayol yoʻlovchilar va yetti yoshgacha boʻlgan (yetti yosh ham kiradi) oʻgʻil bolalar qoʻyiladi.
Hozirda poyezd har kuni qatnamoqda. U Olmaotadan soat 19:05 da joʻnab ketib, ertasi kuni soat 12:53 da Toshkentga yetib keladi. Toshkentdan tarkib soat 14:41 da yoʻlga chiqadi va Olmaotaga soat 08:51 da yetib boradi. Har bir punkt uchun mahalliy vaqt koʻrsatilgan.
«Yoʻlovchi tashish» AJ rahbari Anuar Axmetjanovning soʻzlariga koʻra, ichki yoʻnalishlarda ushbu xizmatga talab juda yuqori — ishga tushirilgan paytdan boshlab undan 946 mingdan ortiq kishi foydalangan. Yangi tarkib qoʻshilganidan keyin ayollar vagonlari boʻlgan yoʻnalishlar soni, Olmaotadan Toshkentgacha boʻlgan reysni ham qoʻshganda, 14 tagacha koʻpayadi.
Bunday vagonlarning oʻziga xosligi nafaqat chiptalarning faqat ayollarga sotilishida, balki ularga faqat ayol kuzatuvchilar (provodnitsalar) xizmat koʻrsatishida hamdir.
Chiptalarni safardan 45 kun oldin sotib olish mumkin. Band qilish paytida ixtisoslashtirilgan vagondagi joy «JN» markirovkasi bilan belgilanadi.