Qozogʻiston prezidenti Rossiyani Turkiy davlatlar tashkiloti tarkibiga kiritishni taklif qildi
Qozogʻiston Prezidenti Qasim-Jomart Tokayev Rossiyaning Turkiy davlatlar tashkilotiga qoʻshilishi yoki unda kuzatuvchi sifatida ishtirok etishi imkoniyatini koʻrib chiqishni taklif qildi. U bu TDT nufuzini oshirishi va uning aʼzolariga foyda keltirishi mumkinligini taʼkidladi.
Qozogʻiston prezidenti Rossiyani Turkiy davlatlar tashkiloti tarkibiga kiritishni taklif qildi
Qozogʻiston prezidenti Qasim-Jomart Tokayev Anqarada oʻtkazilgan Turkiy davlatlar tashkiloti sammitida Rossiyani birlashma tarkibiga kiritish taklifi bilan chiqdi.
«Tashkilotimiz obroʻsini oshirish maqsadida Rossiyaning niyatiga ijobiy munosabat bildirish va unga ushbu formatga qoʻshilishni yoki TDT faoliyatida kuzatuvchi sifatida ishtirok etishni taklif qilish toʻgʻri va adolatli qaror boʻlar edi», — dedi Tokayev.
Qozogʻiston rahbari Rossiya «asrlar davomida turkiy dunyo bilan yaqin aloqalarni saqlab kelayotgani»ni, bu mamlakat hududida esa koʻplab turkiy xalqlar vakillari yashashini taʼkidladi.
«Hozirgi vaqtda Rossiya Qozogʻiston qoʻllab-quvvatlayotgan „Oltoy — turkiy tsivilizatsiya beshigi“ loyihasini ilgari surmoqda. Rus tilidagi koʻplab soʻzlar turkiy kelib chiqishga ega. Umuman olganda, agar Rossiya turkiy mamlakatlarning, yaʼni tashkilotimizning bir qismiga aylansa, bu barcha davlatlarimiz uchun foyda keltirgan boʻlar edi», — dedi u.
Tokayev, shuningdek, joriy yilning may oyida Turkistonda boʻlib oʻtgan TDTning norasmiy sammitidagi bayonotini eslatib oʻtdi. «Men Turkiy davlatlar tashkiloti harbiy alyans emasligi va kelajakda ham harbiy alyansga aylanmasligi kerakligini maʼlum qilgan edim. Bu Qozogʻistonning pozitsiyasidir», — deya taʼkidladi u.