Qo‘shma Shtatlar Eronning Qeshm oroliga zarba berganini ma’lum qildi
Vashington buni mintaqadagi o‘z obyektlarining mudofaasi bilan izohladi. Tramp so‘nggi haftalarda Islom Respublikasiga hujumlar qayta boshlanishiga shama qilayotgan edi.
Qo‘shma Shtatlar Eronning Qeshm oroliga zarba berganini bildirdi
AQSH rasmiysi 2-noyabr kuni mamlakat Qurolli kuchlari Hurmuz bo‘g‘ozidagi Eronning Qeshm oroliga zarbalar berganini ma’lum qildi. Bu haqda Reuters xabar berdi.
Dastlab The Wall Street Journal nashri xabar qilgan bu hujumlar cheklangan xarakterga ega bo‘lgan va keng ko‘lamli harbiy operatsiyalarning qayta boshlanishini anglatmaydi.
Yana bir rasmiyning aytishicha, zarbalar Eronga tegishli “yer-havo” sinfidagi raketalardan AQSH obyektlariga qarshi foydalanilganiga javoban, mudofaa maqsadida amalga oshirilgan. Markaziy qo‘mondonlik (CENTCOM) hozircha bu hujumlar yuzasidan izoh bermadi.
2-noyabr kuni ertalab Eronning IRNA davlat axborot agentligi Qeshm orolida bir nechta portlashlar yuz berganini ma’lum qildi. Fox News telekanali ham manbalarga tayanib, zarbalar AQSH samolyotiga qarata o‘q uzilganiga javoban mudofaa maqsadida berilganini bildirdi.
So‘nggi haftalarda Qo‘shma Shtatlar prezidenti Donald Tramp bugun, 3-noyabr kuni bo‘lib o‘tadigan oraliq saylovlardan keyin Eronga qarshi hujumlarni qayta boshlashga ishora qilib kelmoqda. Biroq 2-noyabr kuni Linkoln xotira majmuasi hovuzi oldida so‘zlagan nutqidan so‘ng, u bu borada boshqacha fikrda ekaniga ishora qildi.