Qirg‘izistonda mehribonlik uylari o‘rniga “Ona uylari” rivojlantiriladi
U yerda turmush sharoiti og‘ir ayollar bolalari bilan yashaydi. Ularga psixologik, tibbiy, ijtimoiy va huquqiy yordam ko‘rsatiladi.
Qirg‘izistonda mehribonlik uylari o‘rniga “Ona uylari” kengaytiriladi
Qirg‘izistonda mehribonlik uylari tizimini bosqichma-bosqich qayta ko‘rib chiqish va og‘ir ahvoldagi onalar farzandlari bilan birga yashashi uchun kichik maskanlar tarmog‘ini rivojlantirish zarur. Bu haqda Jogorku Kenesh (Parlament) deputati Dastan Bekeshev Bishkekdagi “Ona uyi”ga tashrifidan keyin ma’lum qildi, deya xabar berdi “24.kg”.
Deputatning aytishicha, poytaxtning Oktyabr tumanida shunday muassasalardan ikkitasi ishlamoqda. U kecha ulardan biriga bordi. Hozir u yerda og‘ir turmush sharoitidagi sakkiz nafar ona kichik yoshdagi farzandlari bilan yashab turibdi.
Deputatning fikricha, bunday maskanlar bolani oilada saqlab qolish va unga zarur parvarishni ta’minlashga yordam beradi. Uningcha, yirik internatlardagi tarbiyachilar bolalar uchun ota-onaning o‘rnini bosa olmaydi.
“Bola oiladan ajratilmasligi kerak. Unga kimdir g‘amxo‘rlik qilishi zarur. Tarbiyachilar baribir bu vazifani bajara olmaydi, ular ona bo‘la olmaydi”, dedi u.
“Ene uyu” (“Ona uyi”) resurs markazi og‘ir hayotiy vaziyatga tushib qolgan homilador ayollar va bolali onalarni qo‘llab-quvvatlashga yo‘naltirilgan. Maskanlar chaqaloqlardan voz kechishning oldini olish hamda bolalarni oilada saqlab qolish uchun psixologik, tibbiy, ijtimoiy va huquqiy yordam ko‘rsatadi. Bishkekda birinchi shunday markaz 2025-yil may oyida, ikkinchisi esa 2026-yil fevral oyida ochilgan.
Dastan Bekeshev bu tajribani milliy miqyosda rivojlantirishni taklif qilmoqchi. Biroq u davlat barcha xarajatlarni birdaniga o‘z zimmasiga olishi qiyinligini ham tan oldi. Shu sababli bunday muassasalarni tashkil etishga biznes vakillarini ham jalb etish kerakligini aytdi.
Deputat oilalarni qo‘llab-quvvatlash uchun faqat nafaqalarni oshirish yetarli emasligini alohida ta’kidladi. Onalar va bolalar yordam olishi hamda o‘zini xavfsiz his qilishi uchun tizimli o‘zgarishlar zarur.
U bu masalalarni Jogorku Kenesh majlislarida ko‘tarishni rejalashtirmoqda. Shuningdek, Mehnat, ijtimoiy ta’minot va migratsiya vazirligini bolalarni parvarish qilish tizimini isloh qilishda faolroq bo‘lishga chaqirdi. Vazirlik ma’lumotiga ko‘ra, mamlakatdagi 137 ta internatda 10 mingga yaqin bola yashaydi. Ularning 95 foizida ota-onasi yoki qonuniy vakillari bor.