Putin muzokaralarga tayyorligini aytdi, ammo front chizigʻi boʻyicha sulhni qoʻllamadi
Rossiya prezidenti Vladimir Putin AQSH vositachiligida Ukraina bilan uch tomonlama muzokaralarni qayta boshlashga tayyorligini bildirdi. Biroq u janglarni amaldagi front chizigʻi boʻyicha toʻxtatish taklifini qoʻllab-quvvatlamadi va bahsli hududlarni «tarixiy Rossiya» yeri deb atadi.
Putin muzokaralarga tayyor ekanini aytdi, biroq front chizigʻi boʻyicha sulhni qoʻllab-quvvatlamadi
DW xabariga koʻra, Putin bu haqda 22-oktabr kuni eʼlon qilingan, Rossiya davlat mediaholdingi VGTRK jurnalisti Pavel Zarubinga bergan intervyusida maʼlum qilgan.
U AQSH prezidentining maxsus vakili Stiven Uitkoff bilan uchrashuvda Vashington vositachiligida Kiev bilan muloqotni qayta tiklashga rozi boʻlganini aytgan. Putinning soʻzlariga koʻra, muzokaralar qisqa muddatli harbiy tanaffusga emas, balki yakuniy tinchlik kelishuvidan keyin Ukraina va Rossiya xavfsizligini taʼminlash masalalariga qaratilishi kerak.
«Biz shu maqsadga erishish uchun ushbu aloqalarni qayta boshlashga tayyormiz», - degan Rossiya prezidenti.
Shu bilan birga, Moskva muzokaralarda qaysi darajadagi vakillar qatnashishini oshkor qilmagan. Ukraina prezidenti Volodimir Zelenskiy esa Putin va AQSH prezidenti Donald Tramp bilan uch tomonlama uchrashuvda urushni yakunlash masalasini muhokama qilishga tayyorligini bildirgan.
Kreml ilgari bunday uchrashuvni rad etgan yoki Kiev qabul qilmagan shartlarni, jumladan, Zelenskiyning Moskvaga kelishini taklif qilgan edi.
Putin va Uitkoff uchrashuvidan bir necha soat oʻtgach, Rossiya prezidenti yordamchisi Yuriy Ushakov Amerika tomoni olib kelgan takliflar Moskvani toʻliq qoniqtirmasligini aytgan.
Intervyuda Putindan Zelenskiyning janglarni hozirgi front chizigʻi boʻylab toʻxtatishga tayyorligi haqida ham soʻralgan. Rossiya prezidenti bu fikrga qoʻshilish oʻrniga: «Bu ularning hududi emas, bu tarixiy Rossiya hududi», - deb javob bergan.
Avvalroq OAV Donald Tramp ham 2025-yilda, Putin bilan Ankorijdagi uchrashuvidan oldin, janglarni amaldagi front chizigʻi boʻylab toʻxtatish gʻoyasini qoʻllab-quvvatlaganini xabar qilgan edi. Biroq bu Rossiya rahbariyatining Ukraina qoʻshinlarini butun Donbassdan olib chiqish talabi bilan mos kelmaydi.
Putin Rossiya «urishishni istamasligi»ni ham daʼvo qilib, janglar davom etayotgani uchun masʼuliyatni Kiev zimmasiga yuklagan. U ruslar va ukrainlar «bir xalq» ekanini aytgan va buni goʻyo genetik tadqiqotlar tasdiqlashini bildirgan. Intervyuda mazkur tadqiqotlarga aniq havola keltirilmagan.
Ayni paytda, DW qayd etishicha, Putinning Uitkoff bilan uchrashuvidan keyin ham Rossiyaning Ukrainaga hujumlari davom etgan.