Prezident Buxorodagi Bahouddin Naqshband maqbarasini ziyorat qildi
Oʻzbekiston Prezidenti 3 noyabr kuni Buxoro viloyatiga tashrif buyurib, u yerda tarixiy majmuaning ahvoli bilan tanishdi va hududning maʼnaviy merosi muhimligini taʼkidladi.
Prezident Buxorodagi Bahouddin Naqshband maqbarasida boʻldi
3 noyabr kuni Oʻzbekiston prezidenti Shavkat Mirziyoyev Buxoro viloyatiga tashrif buyurdi, bu yerda u bunyodkorlik ishlarining borishi va iqtisodiyotning turli tarmoqlaridagi loyihalar amalga oshirilishi bilan tanishadi. Tashrifning birinchi obʼyekti Kogon tumanidagi Bahouddin Naqshband maqbarasini ziyorat qilish boʻldi.
Majmuada Qurʼon suralari oʻqilib, Oʻzbekiston xalqiga tinchlik va farovonlik tilab duo qilindi.
Xoʻja Muhammad Bahouddin Naqshband — XIV asr ilohiyotchisi va «Naqshbandiya» soʻfiylik tariqati asoschisidir. Asrlar davomida uning maqbarasi atrofida shakllangan meʼmoriy majmua islom dunyosining eng muqaddas ziyoratgohlaridan biri hisoblanadi.
Oʻrtacha hisobda majmuaga har kuni 15 mingga yaqin kishi tashrif buyuradi. U «Ipak yoʻli: Zarafshon-Qoraqum koridori» obʼyekti tarkibida YUNESKOning Butunjahon merosi roʻyxatiga kiritilgan.
Soʻnggi yillarda bu yerda majmuaning tarixiy qiyofasini saqlab qolish va ziyoratchilar uchun sharoitlar yaratish boʻyicha ishlar amalga oshirildi. XV asrga oid chizmalar asosida Doniyolbiy otaliq madrasasi va Toqi Miyona darvozasi qayta taʼmirlandi. Bundan tashqari, muzey ekspozitsiyasi va ilmiy-tadqiqot markazi tashkil etildi.
Mirziyoyev Buxoroning maʼrifiy islomni rivojlantirishdagi tarixiy oʻrnini taʼkidlab, mintaqaning maʼnaviy merosini chuqurroq oʻrganish zarurligini qayd etdi. Uning soʻzlariga koʻra, ushbu merosdan yoshlarni tarbiyalashda, ularni bilim va maʼrifatga jalb etishda foydalanish kerak.
«Islom tsivilizatsiyasi markazi, Imom Buxoriy va Imom Moturidiy nomidagi majmualar — bularning barchasi yagona maqsadga: buyuk ajdodlarimizning ilmiy merosini davom ettirish va yoshlarni shu ruhda tarbiyalashga xizmat qiladi», — dedi prezident.