Pokiston sobiq bosh vaziri Imron Xonning singlisi hibsga olindi
Alima Xanum akasining tarafdorlarini mamlakat boʻylab boʻlib oʻtadigan norozilik namoyishlari oldidan safarbar qilganlikda ayblanmoqda.
Pokiston sobiq bosh vaziri Imron Xonning singlisi hibsga olindi
Pokistonning qamoqdagi sobiq bosh vaziri Imron Xonning singlisi uni qoʻllab-quvvatlash maqsadida keyingi haftaga rejalashtirilgan norozilik namoyishlari oldidan hibsga olindi, deb xabar berdi uning «Pokiston Tahriki Insof» (PTI) partiyasi.
PTI rasmiylarining maʼlum qilishicha, Alima Xonum yakshanba kuni tushdan keyin sharqiy Lohur shahrida hibsga olingan va bu harakatni «noqonuniy ushlab turish» deb atagan. Uning oʻgʻli onasini ozod qilishni talab qilmoqda.
Lohur komissari oʻrinbosari tomonidan chiqarilgan Xonumni hibsga olish toʻgʻrisidagi buyruqda aytilishicha, u Imron Xonning tarafdorlarini «ijtimoiy tarmoqlar va ommaviy uchrashuvlar orqali» safarbar qilib kelgan. Shuningdek, u 30 kun davomida hibsda saqlanishi koʻrsatilgan.
Xonum akasining hibsga olinishini keskin tanqid qilib keladi va uning tarafdorlari hamda OAV bilan muntazam ravishda muloqot qiladi.
Politsiya mulozimi Xonumning hibsga olinganini BBC’ga tasdiqladi. Buyruqda aytilishicha, u Lohurdagi «Kot Laxpat» qamoqxonasiga yuboriladi.
Kunning boshida uning oilasi u bilan «hech qanday aloqa yoʻqligi va qayerda ekanligi haqida maʼlumot yoʻqligini» aytgan edi.
«Biz hukumatdan zudlik bilan uning qayerdaligini oshkor qilishni va xavfsiz qaytishini taʼminlashni talab qilamiz», deb yozdi Xonumning oʻgʻli Shahrez Xon X ijtimoiy tarmogʻida.
Koʻpchilik uning hibsga olinishini 27 sentyabr kuni butun mamlakat boʻylab tashkil etiladigan norozilik namoyishlari bilan bogʻlamoqda, oʻsha kuni namoyishchilar Pokiston poytaxti Islomobodga yurish qilishni rejalashtirgan.
Hibsga olish toʻgʻrisidagi buyruqda aytilishicha, Xonum odamlarni «tartibsizliklar keltirib chiqarishga» safarbar qilgan va «jamoatchilik orasida Hukumatga qarshi nomaqbul shiorlar aytgan/hayqirgan».
Islomobod koʻchalari allaqachon shahardagi hukumat binolarini himoya qilish uchun tayyorlab qoʻyilgan yuk konteynerlari bilan toʻsib qoʻyilgan.
Mahalliy OAV Pokiston ichki ishlar vazirining soʻzlaridan iqtibos keltirishicha, namoyishlar mamlakatga zarar yetkazmoqda va hukumat ularni toʻxtatish uchun qoʻlidan kelgan barcha ishni qiladi.
Xon 2023 yildan beri qamoqda saqlanmoqda, oʻshanda u lavozimda boʻlgan vaqtida olgan sovgʻalarini sotishdan tushgan pullarni deklaratsiya qilmagani uchun uch yilga ozodlikdan mahrum etilgan edi.
Unga nisbatan davlat sirlarini oshkor qilishdan tortib, davlat sovgʻalarini sotishgacha boʻlgan 100 dan ortiq ish boʻyicha ayblovlar qoʻyilgan — u bularning barchasini siyosiy motivlarga ega deb hisoblaydi.
Oʻtgan yili kriket yulduzidan siyosatchiga aylangan Xon yer korruptsiyasi ishi boʻyicha 14 yillik qamoq jazosiga hukm qilindi — bu unga berilgan eng uzoq muddatli jazodir.
Qamoqda boʻlgan vaqtida uning sogʻligʻi yomonlashgan va oʻtgan oy Xon tekshiruvdan oʻtish uchun shifoxonaga borishga majbur boʻlgan edi.