Pokistonda Imron Xonni qamoqdan kasalxonaga yuborish haqida buyruq chiqarildi
Pokiston Oliy sudi 18-avgust kuni sobiq bosh vazir Imron Xonni qamoqxonadan shifoxonaga o‘tkazish haqida buyruq berdi. Bu qaror uning partiyasi va oilasining uzoq vaqtdan beri Imron Xonning sog‘lig‘i yomonlashgani sababli qilgan iltimosini qondirdi. Bu haqda Reuters xabar berdi.
73 yoshli Imron Xon, kriketchi sifatida mashhur bo‘lib, keyinchalik siyosatga kirgan, 2023-yil avgustidan beri Ravalpindi shaharchasidagi qamoqxonada saqlanmoqda. U bir qator jinoiy ishlar bo‘yicha aybdor deb topilgan. Xonning o‘zi 2022-yilda hokimiyatdan chetlatilganidan so‘ng bu ayblovlarni siyosiy sabablarga ko‘ra uyushtirilgan deb hisoblaydi.
2025-yilda uning o‘g‘illari otasining sog‘lig‘i yomonlashayotganidan bir necha bor xavotir bildirgan. Advokatlarining ta’kidlashicha, Imron Xon qamoqxonada o‘ng ko‘zining ko‘rish qobiliyatini sezilarli darajada yo‘qotgan.
"Biz insonning asosiy huquqlarini inobatga olgan holda, mahbusning salomatligi va xavfsizligini ta’minlash uchun ushbu buyruqni chiqaryapmiz", dedi arizani ko‘rib chiqqan uch sudyadan iborat hay’at rahbari, sudya Shohid Vohid.
Sud Imron Xonni 48 soat ichida poytaxt Islomoboddagi Shifa International kasalxonasiga ko‘chirish va u yerda 16-sentyabrgacha qolishi haqida ko‘rsatma berdi. Bu ma’lumotni Xonning matbuot kotibi Naim Haydar Panjutha X tarmog‘ida tasdiqladi.
Shuningdek, sud uning davolanishi uchun tibbiy komissiya tuzishni buyurdi. Komissiya tarkibiga kardiolog, umumiy amaliyot shifokori, ko‘z shifokori va Imron Xonning shaxsiy shifokori kiradi.
Imron Xonning "Pokiston Tahriki Insof" (PTI) partiyasi sud qarorini mamnuniyat bilan qarshiladi. Partiya bu qaror zudlik bilan, to‘liq va kechiktirmasdan bajarilishi kerakligini bildirdi.
"Zora bu qaror barvaqtroq chiqarilganda edi, shunda uning ko‘zi va umumiy salomatligi bunchalik yomonlashmas edi", dedi PTI matbuot kotibi Zulfiqor Buxoriy.
Shuningdek, partiya sud qaroriga muvofiq o‘z a’zolari va Imron Xonning tarafdorlarini kasalxona atrofida to‘planmaslikka chaqirdi.
Hukumat bu sud qaroriga hech qanday munosabat bildirmadi. Axborot va ichki ishlar vazirliklari Reuters agentligining so‘rovlariga javob qaytarmadi. Imron Xon ishonchsizlik votumi orqali hokimiyatdan ketganidan beri ko‘plab ayblovlarga duch kelgan. Ular orasida davlat xazinasi sovg‘alari va noqonuniy nikoh bo‘yicha ayblovlar bor. Ayrim jazo hukmlari bekor qilingan yoki ijrosi to‘xtatilgan, apellyatsiyalar esa ko‘rib chiqilmoqda. U esa har qanday qonunbuzarlikni rad etmoqda.
Xonning 2023-yil may oyida hibsga olinishi ommaviy e’tirozlarga sabab bo‘lgan. O‘shanda yuzlab odamlar davlat binosiga hujum qilib, harbiy obyektlarni vayron qilgan edi. Uning tarafdorlari shundan beri ham uni ozod qilishni talab qilib bir necha bor ko‘chalarga chiqqan.
Dunyodagi kriket afsonalari, jumladan qo‘shni va raqobatchi Hindiston sportchilari ham fevral oyida Imron Xonga yaxshiroq munosabatda bo‘lishni talab qilgan. Ular Xonning qamoqxona sharoitidan chuqur xavotir bildirgan. Hukumat esa shafqatsiz munosabatda bo‘lish haqidagi ayblovlarni rad etadi.
PTI partiyasi 2018-yilda hokimiyatga kelgan va asosiy provinsiyalarda katta qo‘llab-quvvatlovga ega. Biroq 2024-yilgi saylovlar oldidan partiya o‘zining saylov belgisidan mahrum qilingan.