«Pikasso asarini boʻlaklarga boʻlishdek gap»: «Neighbours» serialining sunʼiy intellekt tomonidan mikrodramaga aylantirilishi aktyorlar va suratga olish jamoasini xavotirga solmoqda

«Pikasso asarini boʻlaklarga boʻlishdek»: «Qoʻshnilar» serialining SI mikrodrama tahriri aktyorlar va tasvirga olish guruhini xavotirga solmoqda

Yangi mikrodrama Margo Robbi ijro etgan qahramonga qaratiladi

«Qoʻshnilar» (Neighbours) serialining sobiq aktyorlari va suratga olish guruhi aʼzolari eski tasvirlarni mobil tomoshabinlar uchun kichik epizodlarga qayta tahrirlashda SIdan foydalanish rejalaridan xavotir bildirdilar.

Avstraliyaning endilikda yopilgan ushbu TV-sop operasi prodyuseri boʻlmish Fremantle kompaniyasi AQShda joylashgan RoseBerry Media bilan hamkorlikda «oʻn yilliklar davomidagi epizodlarni skanerlash» va qisqa vertikal videolar yaratishga yordam beradigan SI loyihasi ustida ish boshladi.

Foydalaniladigan birinchi material 2008 yildan 2011 yilgacha Donna Fridman rolini oʻynagan Margo Robbi ishtirokidagi tasvirlar boʻladi.

Xar ikkala kompaniya ushbu loyiha oʻtgan yili soʻnggi qismi efirga uzatilgan shouni yangi tomoshabinlarga tanishtirishini aytmoqda. Ammo baʼzi aktyorlar va suratga olish guruhi aʼzolari oʻz qiyofalari, ovozlari yoki mehnat mahsulidan boshqa maqsadlarda foydalanishga rozilik bermaganini taʼkidlamoqda.

Robbi hozircha bu borada oshkora izoh bergani yoʻq.

Loyiha ortida turgan kompaniyalar oʻz bayonotida SI koʻmagidagi texnologiya «qahramonlar rivojlanishi, syujet chiziqlari va eng yorqin lahzalarni aniqlash uchun oʻn yillik epizodlarni skanerlab, muharrirlarga eng kuchli materialni tezda topishga yordam berishini» bildirdi.

Fremantle vakilining soʻzlariga koʻra, mikrodrama epizodlarida «asliyatdagi, avval efirga uzatilgan tasvirlar, dialoglar va ijrolar»dan foydalaniladi.

«U yangi sahnalar yoki ijrolarni yaratmaydi, aktyorlarning yuzlari yoki qiyofasini oʻzgartirmaydi va sintitik ovozlardan foydalanmaydi», dedi u va inson-muharrir «tahrirlash jarayonining har bir bosqichini koʻrib chiqishi va tasdiqlashini» qoʻshimcha qildi.

Kichik epizodlarda 2005 yilda, 13 yoshida «Qoʻshnilar» serialiga kelib qoʻshilgan 34 yoshli Mett Verkmeyster ham paydo boʻlishi mumkin. U doimiy qahramon Zek Kinski rolini oʻynagan va Robbi ijro etgan qahramon bilan koʻplab sahnalarda birga suratga tushgan.

Hozirda Melburnda prodyuser va rejissyor boʻlib ishlayotgan Verkmeysterning aytishicha, mikrodrama ortida turgan kompaniyalar u bilan bogʻlanmagan va u epizodlarga nimalar kiritilishidan xavotirda.

«Agar ular allaqachon mavjud boʻlgan narsadan yangi mikrodrama yaratayotgan boʻlsa, fikrimcha, bizning qiyofamiz va ovozimizdan, shuningdek, stsenariynavislar mehnatidan foydalanish uchun rozilik olinishi kerak», dedi u.

Robbi «shubhasiz, katta jalb qiluvchi omil» va «ilgari tomosha qilgan shoularingizdan eski lavhalarni koʻrish yoqimli», dedi Verkmeyster, ammo u bundan yigirma yil oldin shartnoma imzolaganida «striming hatto platforma sifatida mavjud emas edi», shuning uchun u oʻz huquqlari nimalardan iborat ekaniga amin emas.

Xuddi shu noaniqlik Sem Klarkni ham oʻylantirmoqda. U 2006 yildan 2010 yilgacha «Qoʻshnilar»da Ringo Braun rolini oʻynagan, ushbu qahramon keyinchalik Robbining toʻqima qahramoniga uylanadi.

Los-Anjelesdan turib gapirgan Klark – hozirda prodyuser va ovoz aktyori – doʻsti unga maqola yubormaguncha mikrodrama haqida eshitmaganini aytdi.

«Agar u yangi syujet chiziqlariga aylantirib yuborilmasa, koʻp yillar oldin qilgan ishimiz ikkinchi hayotga ega boʻlishiga salbiy qaramayman», dedi 39 yoshli Klark.

«20 yil oldin shartnomamga qoʻl qoʻyganimda SI va ijtimoiy tarmoqlar, tabiiyki, mavjud emas edi, shuning uchun men hali ham bu chegaralar aynan nimadan iborat ekanini tushunishga harakat qilyapman».

Ovoz operatori, 68 yoshli Bryus Findley TV sohasida ellik yilga yaqin vaqtini oʻtkazgan va «Qoʻshnilar» serialining birinchi epizodidan beri ishlagani uchun u qalbida «alohida oʻrin» tutishini aytadi.

Uning aytishicha, eski tasvirlardan qisqa epizodlar tayyorlashda SIdan foydalanish «Pikasso asarini boʻlaklarga boʻlib, uni qayta yigʻishga oʻxshaydi».

«Biz ushbu mahsulotni chiqarish uchun juda qattiq mehnat qilganmiz… endi esa ular uni mayda boʻlaklarga boʻlib, havoga sovurishmoqda va SI yordamida yana qayta yigʻishmoqda - bu mehnat jarayonini qadrsizlantiradi».

RoseBerry Media rahbari Gay Hameyrining aytishicha, kompaniya «premium vertikal televideniye» yaratish uchun oʻz SI vositasidan foydalanib, «Qoʻshnilar» tasvirlarini — 9 300 dan ortiq epizodni — birinchi marta saralab chiqmoqda.

Uning taʼkidlashicha, loyiha materialni «qayta tasavvur qiladi» va unga «yangi tomoshabinlar, yangi dolzarblik va yangi qiymat» bagʻishlaydi.

Fremantle kompaniyasining tijorat va xalqaro boʻlimi rahbari Yens Rixter ushbu loyihani ularning katalogidan «texnologiya va ijodiy fikrlash qanday qilib yangi qiymat ochishi mumkinligining hayajonli misoli» deb taʼrifladi.

Fremantle ushbu masala boʻyicha ikkita kasaba uyushmasi bilan muzokaralar olib borayotgani va royalti — aktyorlar va stsenariynavislarning ishlari qayta efirga uzatilganda yoki sindikatsiya qilinganda beriladigan doimiy toʻlovlar — toʻlanishi tushuniladi, ammo bu suratga olish guruhiga tatbiq etilmaydi.

Kasaba uyushmalaridan biri boʻlmish Media, Entertainment and Arts Alliance muzokaralarni tasdiqladi.

«Ishchilarning qiyofasi yoki tajribasidan oʻn yillar oldin shartnoma imzolaganlarida xayollariga ham keltirmagan tarzda foydalanishdan oldin ular bilan maslahatlashilishi kerak», dedi MEAA bosh direktori vazifasini bajaruvchi Adam Portelli.