Pensiya tayinlash boʻyicha ixcham boshqaruv tizimi joriy etilmoqda
Tajriba doirasida Pensiya jamgʻarmasining hududiy boshqarmalari davlat pensiyalarini tayinlash, qayta hisoblash, turini oʻzgartirish va toʻlashni tashkil etish boʻyicha vakolatlarga ega boʻladi. Pilot loyiha 2026 yilning oktyabr–dekabr oylarida oʻtkaziladi, 2027 yilning yanvaridan esa yangi mexanizmni butun mamlakat boʻylab joriy etish rejalashtirilmoqda.
Pensiya tayinlash boʻyicha ixcham boshqaruv tizimi joriy etilmoqda
Vazirlar Mahkamasining 19.10.2026 yildagi «Fuqarolarga davlat pensiyalarini tayinlash boʻyicha ixcham xizmat koʻrsatish tizimini bosqichma-bosqich joriy etish chora-tadbirlari toʻgʻrisida»gi 576-son qarori qabul qilindi.
Prezidentning 26.06.2025 yildagi PF-105-son Farmonida 2027 yil 1 yanvardan boshlab Gʻaznachilik va Pensiya jamgʻarmasi tizimlarini raqamlashtirish va avtomatlashtirish orqali Gʻaznachilik qoʻmitasi hamda Pensiya jamgʻarmasining tuman (shahar) boʻlimlarini tugatish va hududlarda ixcham ofislarni tashkil etish nazarda tutilgan.
Bunda Gʻaznachilik qoʻmitasi va Pensiya jamgʻarmasining hududiy boshqarmalarida har bir tuman va shaharda 1–3 ta shtat birligidan iborat xizmat koʻrsatish ixcham ofislari tashkil etiladi.
Hujjatga koʻra, 2026 yilning oktyabr–dekabr oylarida tajriba tariqasida Andijon, Samarqand va Sirdaryo viloyatlarining ayrim shaharlarida Pensiya jamgʻarmasining pensiyalarni tayinlash, qayta hisoblash, pensiya turini oʻzgartirish va toʻlovlarni tashkil etish bilan bogʻliq vazifa va funktsiyalari Pensiya jamgʻarmasining hududiy boshqarmalariga oʻtkaziladi.
Pilot tumanlarining barcha hududiy boshqarmalarida Davlat pensiyalarini tayinlash va toʻlash tartibi toʻgʻrisidagi nizomga (VMQning 13.10.2022 yildagi 592-son qarori bilan tasdiqlangan) muvofiq pensiyalarni belgilash va toʻlash uchun 3 kishidan iborat komissiya tuziladi.
Tajriba natijalariga koʻra, ushbu mexanizmni 2027 yil 1 yanvardan eʼtiboran butun respublika boʻylab joriy etish rejalashtirilmoqda.
Hujjat Qonunchilik maʼlumotlari milliy bazasida davlat tilida eʼlon qilingan va 19.10.2026 yildan kuchga kirdi.