Oʻzbekiston hukumati xususiylashtirishdan kamida 1,2 milliard dollar daromad olishni rejalashtirmoqda

Oʻzbekiston hukumati xususiylashtirishdan kamida $1,2 mlrd olishni moʻljallamoqda

2026 yil oxirigacha Oʻzbekiston hukumati davlat mulkini xususiylashtirishdan kamida 14 trln soʻm yoki qariyb $1,2 mlrd tushum olishni rejalashtirmoqda. Savdolarga 84 ta kompaniyadagi ulushlar, 1 242 ta koʻchmas mulk obʼyekti va taxminan 8 ming gektar yer maydoni chiqarilishi koʻzda tutilgan. Ushbu aktivlarning umumiy qiymati taxminan 100 trln soʻmga yoki $8,4 mlrd ga baholanmoqda.

Bu haqda Davlat aktivlarini boshqarish agentligi direktori Sohibjon Murodov agentlikning 2026 yilning toʻqqiz oyidagi faoliyati yakunlarini sarhisob qilar ekan, maʼlum qildi.

Allaqachon yakunlangan eng yirik bitimlar orasida u Coca-Cola Uzbekistan’dagi davlat ulushining $252 mln ga, «Fargʻonaazot»dagi ulushning $140 mln ga, shuningdek, Samarqand avtomobil zavodidagi 75,2% davlat ulushining $80 mln ga sotilganini tilga oldi. Ushbu bitimlar yil oxirigacha moʻljallangan yangi xususiylashtirish dasturiga kiritilmagan.

Kompaniyalardagi ulushlarni realizatsiya qilishdan tashqari, hokimiyat organlari tadbirkorlik va shaharsozlik faoliyati uchun moʻljallangan 1 242 ta koʻchmas mulk obʼyekti va 8 ming gektarga yaqin yer maydonini sotishni nazarda tutmoqda. Davlat ishtirokidagi yana 85 ta korxonani tugatish yoki qayta tashkil etish rejalashtirilgan.

Bundan tashqari, ilgari sotilmay qolgan 84 ta aktiv boshlangʻich narxi 1 mln soʻm bilan takroran auktsionlarga chiqariladi.

Yer maydonlari allaqachon 4,7 trln soʻm daromad keltirdi. Yil boshidan buyon tadbirkorlarga 11 796 ta lot doirasida umumiy qiymati 4,7 trln soʻmlik 2,8 ming gektar yer maydoni realizatsiya qilindi.

Alohida ravishda fuqarolar va yuridik shaxslar foydalanishida boʻlgan umumiy maydoni 3 509 gektarlik 36,5 mingtadan ortiq yer uchastkasi xususiylashtirildi.

Xususiylashtirishni jadallashtirish uchun hukumat davlat mulkini sotib olish shartlarini qayta koʻrib chiqmoqda. Boʻnak toʻlovi 35 foizdan 15 foizgacha kamaytirildi, qolgan summani esa foizsiz boʻlib-boʻlib toʻlashga ruxsat berildi. Nazarda tutilgan shartlar bajarilgan taqdirda, xaridorlar 25 foizgacha chegirma olishlari ham mumkin.

2026 yilning toʻqqiz oyi yakunlariga koʻra, xususiylashtirish hajmi 26 trln soʻmni tashkil etdi. Ushbu davrda savdolarga umumiy qiymati 53,2 trln soʻmlik davlat aktivlari va yer uchastkalari chiqarildi.